Medijowa informacija Nowy wósadnik nr. 2 jo wujšło

Medijowa informacija
Nowy wósadnik nr. 2 jo wujšło
Kśesćijańske Serby maju wót zachopjeńka 2016 nowe móžnosći za informaciju a
wuměnjenje. Dajo něnto swójski internetny wustup ewangelskich Serbow w cerkwi
Barlinja–Bramborskeje–šlazyńskeje Górneje Łužyce na adresy www.serby.ekbo.de.
Spěchowańske towaristwo za serbsku rěc w cerkwi z. t. jo wjelgin gjarde, až se raźiło pó
wušej 100lětnem pśestanku wudaś znowa cerkwine łopjeno w dolnoserbskej rěcy, kenž
ma informěrowaś wó serbskem cerkwinem žywjenju we Łužycy. Tós ten newsletter z
titelom „Nowy wósadnik“ ma wudopołniś mjasecny cerkwiny bok w Nowem Casniku a
informacije dane w interneśe. Wón dej twóriś móst mjazy serbskimi kśesćijanami we
łužyskich wósadach ewangelskeje cerkwje.
Slědny „Wósadnik“ póchada z lěta 1913. Tencas wuda ako zagronity redaktor Fryco
Rocha z Turjeja.
Prědny numer „Nowego wósadnika“ běšo zjawjona ku gódam 2015. Dypkownje
k jatšam jo wujšło něnto druge wudaśe cerkwinego łopjena „Nowy wósadnik“. Se wě, až
tema togo zešywka su jatšy. Bibliske słowo wó jatšownem gronku „Ten Kněz jo górjej
stanuł, jo wót wěrnosći górjej stanuł.“ jo napisała fararka Katherina Köhlerowa z Dešna.
Kak to něga běšo a lětosa wuglěda z nałogom jatšownego spiwanja, wopisujotej Werner
Měškank z Města a Diana Šejcowa z Hochoze. Tradicija a spomnjeśe stej wažnej:
Siegfried Malk z Bórkow spomina z wósobinskim pśinoskom na prjatkarja Jura Frana,
kenž jo wumrěł w januarje 2016, a Madlena Norbergowa z Chóśebuza na fararja
Herberta Nowaka, kenž by wóswěśił 23. apryla 2016 swój 100. narodny źeń.
Wopśimjeśe zešywka dopołniju rědne jatšowne bildki z Bórkow a wšakorake terminy
cerkwinego lěta.
„Nowy wósadnik“ nr. 2 jo był rozesłany w měrcu 2016 na wósady a fararjow w Dolnej,
Srjejźnej a Górnej Łužycy a na cłonki Spěchowańskego towaristwa. Wušej togo se dajo
downlodowaś ako pdf-dataja na internetnem boce www.serby.ekbo.de.
Hartmut S. Leipner
pśedsedaŕ Spěchowańske towaristwo za serbsku rěc w cerkwi z. t.
Dalšne informacije:
wudawaŕ Nowego wósadnika: Spěchowańske towaristwo za serbsku rěc w cerkwi z. t.,
c/o Droga Gertraudty 1, D-03046 Chóśebuz
Nowy wósadnik jo zaregistrěrowany pód cysłom ISSN 2367-1971.
zagronity redaktor: dr. Hartmut S. Leipner, Pśi Góramśicy 29, D-03042 Chóśebuz
Titelowy bok: