Tsib Hlis Ntuj
Transkrypt
Tsib Hlis Ntuj
T H A W J P A W G T H A W J T S W J H W M T S A B X O V, T S I B H L I S N T U J 2 0 1 3 Los ntawm Thawj Tswj Hwm Thomas S. Monson Kev Mloog Lus Yuav Coj Koob Hmoov Los Peb yuav tau qhov tseeb thiab cov lus teb rau peb tej lus nug thaum uas peb ua raws li Vajtswv cov lus txib. K uv cov kwv tij cov muam, kuv zoo siab ua Vajtswv tsaug vim kuv nrog nej koom ua ke tag kis no. Kuv xav tau nej txoj kev ntseeg thiab kev thov Vajtswv txhawb pab kuv thaum kuv los hais lus rau nej. Txij thaum chiv keeb los, cov poj niam thiab txiv neej xav paub qhov tseeb thiab to taub ntsig txog lub neej no thiab lawv nyob li cas thiab lub ntsiab rau lub neej no, thiab yuav ua li cas tau kev thaj yeeb nyab xeeb thiab kev zoo siab. Peb txhua tus yuav tshawb nrhiav txog tej no. Txoj kev paub thiab kev to taub tej no yog ib yam uas tib neeg sawv daws txais tau. Yus nrhiav pom tau cov no hauv tej kev tseeb uas kav mus ib txhis. Nyob hauv phau Lus Qhuab Qhia thiab Kev Khi Lus, tshooj 1, nqes 39, peb nyeem hais tias: “Saib seb, vim tias, tus Tswv yog Vajtswv, thiab tus ntsuj plig qhia qhov qhov xwm txheej, thiab qhov xwm txheej yog qhov tseeb, thiab qhov tseeb nyob mus ib txhis thiab ib txhis li.” Tus kws sau paj lug sau ntawv hais tias: Txawm tias lub ntuj ceeb tsheej ploj mus thiab lub ntiaj teb tawg rhe, Qhov tseeb, uas puv txhua nrho, yuav kov yeej txhua yam kev phem, Kav mus ib txhis, tsis pauv, uas nyob tas mus li.1 Ib txhia yuav nug hais tias, “Yuav nrhiav qhov tseeb ntawd qhov twg, thiab peb yuav ua li cas thiaj paub thaum peb twb nrhiav tau lawm?” Nyob hauv ib txoj kev tshwm sim uas tus Yaj Saub Yauxej Xamiv txais hauv lub zos Kirtland, Ohio, hauv lub Tsib Hlis Ntuj xyoo 1833, tus Tswv tshaj tawm hais tias: “Qhov tseeb yog thaum paub tias tej yam zoo li cas, thiab thaum ub zoo li cas, thiab yuav zoo li cas yav tom ntej. . . . “Tus Ntsuj Plig rau qhov tseeb yog los ntawm Vajtswv los. . . . “Thiab tib neeg txais tsis tau tag nrho mus txog rau thaum nws ua raws cov lus txib. “Tus uas ua raws li [Vajtswv] cov lus txib yuav txais qhov tseeb thiab 1 qhov kaj, mus txog thaum nws tau yeeb koob hauv qhov tseeb thiab paub txog txhua yam tsav.” 2 Yog ib lo lus cog tseg zoo kawg nkaus! “Tus uas ua raws li [Vajtswv] cov lus txib yuav txais qhov tseeb thiab qhov kaj, mus txog thaum nws tau yeeb koob hauv qhov tseeb thiab paub txog txhua yam tsav.” Hauv lub caij nyoog uas to taub ntau yam vim twb muab txoj moo zoo txum tim rov qab los, koj los kuv tsis tas yuav, mus hauv tej chaw uas neeg tsis tau mus txog los sis tsis tas taug tej kev uas neeg tsis taug dua mus nrhiav qhov tseeb. Ib Leej Txiv Saum Ntuj Ceeb Tsheej tau npaj kev rau peb thiab tau muab ib tug qauv rau peb—uas yog kev mloog lus. Peb yuav tau qhov tseeb thiab cov lus teb rau peb tej lus nug thaum uas peb ua raws li Vajtswv cov lus txib. Peb kawm kev mloog lus hauv tag nrho peb lub neej. Pib thaum peb tseem hluas, cov uas saib xyuas peb tsa tej kev cai thiab kev cai coj uas pab kom peb txhob raug xwm txheej. Lub neej no yuav haj yam yooj yim rau sawv daws yog tias peb yuav ua raws nraim li tag nrho tej kev cai no. Tiam sis, peb coob leej, thaum ua ub ua no peb kawm kev txawj ntse thaum peb mloog lus. Thaum kuv tab tom loj hlob, txhua lub caij ntug sov thaum lub Xya Hlis mus txog lub Cuaj Hli ntuj, kuv tsev neeg tau mus nyob hauv peb lub tsev pem roob hauv lub Tshav Puam Vivian, hauv lub Kwj Hav Provo Utah. Kuv ib tug phooj ywg zoo thaum lub sij hawm uas peb nyob pem roob yog Danny Larsen, nws tsev neeg muaj ib lub tsev hauv lub Tshav Puam Vivian ntawd. Txhua hnub wb tau ua si, mus nuv ntses, khaws pob zeb thiab lwm yam khoom, nce roob, nce pob tsuas, thiab muaj kev lom zem txhua txhua na this hauv txhua txhua hnub. Muaj ib tag kis Danny wb txiav txim siab tias hmo ntawd wb yuav rauv taws nrog wb cov phooj ywg uas nyob pem roob. Wb tsuas xav luaj ib thaj teb rau peb sawv daws los sib sau ua ke. Cov nyom thaum lub Rau Hli Ntuj ntawd twb qhuav qhawv thiab muaj pos, ces thaj teb ntawd yuav tsis zoo rauv taws. Wb tau pib rub cov nyom siab siab, yuav tu ib thaj loj loj ua ib lub voj voog. Txawm wb sib zog rub npaum li cas los, peb tsuas rub tau me ntsis nroj tsuag xwb. Wb paub tias yuav tau ua hauj lwm tas hnub ntawd thiaj tas, thiab wb twb pib qaug zog thiab tsis muaj lub siab xav ua lawm. Thaum ntawd kuv muaj yim xyoo xwb ces txawm tau ib qho tswv yim uas kuv xav tias yuav zoo. Kuv hais rau Danny tias, “Wb cia li muab cov nroj tsuag no hlawv lawm pauj. Wb mam li hlawv ib lub voj voog ntawm cov nroj tsuag!” Nws pom zoo ua li ntawd, ces kuv txawm khiav mus hauv tsev nqa cov khas khiv. Tsam nej leej twg xav yuam kuv hais tias thaum wb muaj yim xyoo wb muaj cai siv cov khas khiv, kuv qhia nej tseeb tias Danny wb yeej raug txwv tsis pub siv cov khas khiv yog tias tsis muaj neeg laus saib xyuas wb. Lawv twb ceeb toom wb ntau zaus lawm hais tias hluav taws muaj tau xwm txheej li cas. Tiam sis, kuv paub kuv tsev neeg khaws cov khas khiv qhov twg, thiab wb yuav tsum luaj thaj teb ntawd. Kuv twb tsis xav zoo zoo, ces kuv tau khiav mus hauv tsev thiab muab ob peb tug khas khiv, yeej tsis pub leej twg pom kuv mus muab. Kuv muab cov khas khiv ntim tsuag tsuag hauv kuv hnab ris. Kuv tau khiav mus ntsib Danny, zoo siab hlo vim kuv muaj cov ntawd hauv kuv hnab ris uas yuav kho wb qhov teeb meem. Kuv tau xav tias qhov hluav taws yuav kub txog qhov chaw uas peb xav ces yuav cia li tuag mus xwb. Kuv tau txhuam ib tug khas khiv ntawm ib lub pob zeb thiab tau hlawv cov nyom qhuav qhawv ntawd. Cov nroj cig cuag li yuav twb nchuav roj av rau lawm. Thaum xub thawj Danny wb zoo siab heev thaum peb pom cov nroj ploj mus, tiam sis tib pliag xwb wb txawm paub tias qhov hluav taws yuav tsis tuag li. Wb tsis paub yuav ua li cas thaum wb paub tias wb muab tua tsis tau. Tej nplaim hluav taws tau raws cov nyom mus rau ntawm lub roob, yuav ua rau cov ntoo thuv thiab txhua yam kub hnyiab tas. Thaum kawg ces wb tau khiav mus nrhiav neeg pab. Tsis ntev tom qab ntawd cov txiv neej thiab poj niam hauv Tshav Puam Vivian ntawd tau nqa tej phuam uas ntub dej tuaj pab, ntaus cov nplaim taws sim muab qhov hluav taws tua. Tom qab ob peb xuab moos lawv twb tua tag nrho tej hluav ncaig tuag tas. Twb cawm tau cov ntoo thuv, thiab tej tsev uas yuav raug kub hnyiab ntawd thiab. Danny wb kawm tej yam tseem ceeb hnub ntawd—tej zaum qhov tseem ceeb tshaj yog qhov uas wb kawm tias yuav tsum mloog lus. Muaj tej kev cai coj thiab tej kev cai uas pab kom peb sab cev nqaij daim tawv yuav puaj phais. Tib yam li ntawd, tus Tswv tau muab tej tswv yim thiab tej lus txib uas yuav pab peb sab ntsuj plig kom puaj phais xwv kom peb yuav taug tau kev hauv lub neej nyuaj nyuaj no kom peb rov qab mus nrog Leej Txiv Saum Ntuj Ceeb Tsheej nyob ua ke dua. Ntau pua xyoo tas los lawm, rau ib tiam neeg uas rau siab muab tsiaj txhu txi rau Vajtswv, Xamuyees ua siab loj tshaj tawm hais tias, “Kev mloog tus Tswv lus zoo dua qhov uas muab tej yaj zoo nkauj tua fij rau nws.” 3 Hauv lub caij nyoog no, tus Tswv qhia rau tus Yaj Saub Yauxej Xamiv hais tias Nws xav “tkom yus muaj lub siab thiab lub ntsws uas kam ua; thiab cov uas kam ua thiab mloog lus 2 yuav noj tej uas zoo ntawm thaj av Xi-oos nyob rau hauv hnub nyoog kawg no.” 4 Txhua tus yaj saub, cov thaum ub thiab cov niaj hnub nim no, twb paub tias kev mloog lus yog ib yam uas peb yuav tsum ua kom peb thiaj tau txoj kev txhiv dim. Nifais hais tias, “Kuv yuav mus thiab ua tej uas tus Tswv tau txib kom ua.” 5 Txawm tias lwm tus neeg tau thim txoj kev ntseeg thiab tsis tau mloog lus los, tsis muaj ib zaug uas Nifais tsis kam ua raws li tus Tswv txib nws ua. Ntau tiam neeg tau koob hmoov vim lawv tau ua li no. Zaj dab neeg txog Anplaham thiab Ixaj piav zoo zoo txog kev mloog lus. Nyuaj nyuaj kawg rau Anplaham, los mloog Vajtswv cov lus txib, es thiaj tau coj nws tus tub uas nws hlub Ixaj mus rau hauv Mauliyas thaj teb yuav muab nws tua hlawv fij rau Vajtswv. Peb xav puas tau tias Anplaham nyuaj siab npaum li cas thaum nws taug kev mus rau qhov chaw no? Nws yeej tau muaj kev nyuaj siab thiab mob siab kawg thaum nws muab Ixaj khi cia, muab nws pw ntawm lub thaj, thiab tuav rab riam yuav muab nws tua pov tseg. Nws tsis thim nws txoj kev ntseeg thiab yeej tso siab plhuav rau tus Tswv, nws tau ua raws li tus Tswv txib lawm. Lo lus tshaj tawm zoo npaum li cas, thiab nws los xav tsis thoob thaum nws hnov hais tias: “Tsis txhob tua tus me tub ko thiab tsis txhob ua li cas rau nws hlo li: nim no kuv paub hais tias koj yeej mloog lus thiab hwm Vajtswv heev, rau qhov koj tsis khuv xim koj tib leeg tub, koj zoo siab hlo coj tuaj pub rau kuv.” 6 Anplaham twb raug kev sim siab thiab kev xeem lawm, thiab vim nws rau siab ntseeg thiab mloog lus tus Tswv tau cog lus tseg li no hais tias: “Thiab kuv yuav foom koob hmoov tawm ntawm koj cov xeeb ntxwv mus rau txhua haiv neeg uas nyob thoob ntiaj teb, vim koj mloog kuv lus.” 7 Txawm tias peb tsis tas qhia tseeb hais tias peb mloog lus ua ib yam loj loj li no thiab mob peb siab npaum, tab sis mas peb tseem yuav tau mloog lus. Thawj Tswj Hwm Joesph F. Smith thaum lub Kaum Ob Hlis Ntuj xyoo 1873 hais tias, “Kev mloog lus yog thawj txoj kev cai saum ntuj ceeb tsheej.” 8 Thawj Tswj Hwm Gordon B. Hinckley hais tias, “Ib Tsoom Haiv Neeg Ntseeg hauv Hnub Nyoog Kawg yuav tau kev zoo siab, Tsoom Haiv Neeg Ntseeg hauv Hnub Nyoog Kawg yuav tau kev thaj yeeb nyab xeeb, Tsoom Haiv Neeg Ntseeg hauv Hnub Nyoog Kawg yuav vam meej, Tsoom Haiv Neeg Ntseeg hauv Hnub Nyoog Kawg yuav huaj vam, thiab tau kev tsa nto thiab kev txhiv dim tas mus ib txhis yog tias lawv yuav mloog lus thiab ua raws li Vajtswv . . .tej lus qhuab qhia.” 9 Cov yaj saub ib txwm mloog lus; kev mloog lus tau pab lawv to taub thiab muaj dag zog hauv txhua lub caij. Tseem ceeb heev kom peb paub tias peb, los yeej txais tau lub dag zog thiab kev paub no. Niaj hnub no peb txhua tus txais tau qhov no thaum peb ua raws li Vajtswv cov lus txib. Tau ntau xyoo, kuv twb paub coob leej uas rau siab ntseeg thiab mloog lus zoo zoo. Kuv tau koob hmoov thiab lawv tau tshoov kuv siab. Kuv xav qhia nej txog ob tug neeg ntawd. Walter Krause yog ib tug mej zeej zoo kawg hauv lub Koom Txoos, uas nrog nws tsev neeg, tau nyob hauv qhov chaw hu ua Yelimas Sab Hnub Tuaj Teb tom qab Kev Tsov Rog Thoob Ntiaj Teb Zaum Ob. Txawm nws muaj kev nyuaj siab npaum li cas vim thaj chaw ntawd tsis muaj kev ywj siab li lub sij hawm, Tij Laug Krause yog ib tug neeg uas hlub thiab ua hauj lwm pab tus Tswv. Nws rau siab ntso ua tib zoo ua txhua txoj hauj lwm uas nws raug hu los ua. Lwm tus txiv neej hu ua, Johann Denndorfer, uas nyob hauv Hungary teb, yog ib tug uas hloov los ntseeg lub Koom Txoos hauv Yelemes teb thiab tau ua kev cai raus dej nyob ntawd thaum xyoo 1911 thaum nws muaj 17 xyoos. Tsis ntev tom qab ntawd nws rov qab mus nyob tim Hungary teb. Tom qab Kev Tsov Rog Thoob Ntiaj Teb Zaum Ob, nws yeej ua cuag li nws yog neeg raug kaw qhov taub hauv nws lub teb chaws, nyob hauv lub nroog Debrecen. Twb tshem txoj kev ywj siab los ntawm cov neeg uas nyob hauv Hungary teb thiab. Tij Laug Walter Krause, uas yeej tsis paub Tij Laug Denndorfer, raug txib mus qhia nws tom tsev thiab kom ib sij yuav mus xyuas nws. Tij Laug Krause hu mus rau nws tus khub uas mus qhia tom tsev thiab hais tias, “Wb raug txib mus xyuas Tij Laug Johann Denndorfer. Koj puas khoom nrog kuv mus ntsib nws lub lim piam no thiab qhia nws ib zaj lus qhia txog txoj moo zoo?” Ces nws hais ntxiv tias, “Tij Laug Denndorfer nyob rau hauv Hungary teb.” Nws tus khub uas xav tsis thoob hais tias, “Wb yuav mus thaum twg?” Tij Laug Krause teb hais tias “Tag kis os.” Ces nws tus khub nug hais tias, “Es thaum twg mam rov qab los?” Tij Laug Krause teb hais tias, “Au, tej zaum ib lim tiam tom ntej no—yog wb los tau txog tsev.” Ces ob tug txiv neej no txawm sawv kev yuav mus xyuas Tij Laug Denndorfer, nkawd caij tsheb ciav hlau thiab tsheb npav ntawm Yelamis sab hnub tuaj pem qaum teb mus rau lub nroog Debrecen, Hungary teb— yeej deb kawg. Tij Laug Denndorfer tsis tau muaj neeg tuaj xyuas tom nws tsev txij li thaum ua ntej kev tsov rog. Ua nim no, thaum nws pom tus Tswv ob tug tub qhe no, nws zoo siab kawg nkaus vim nkawd tau tuaj xyuas no. Thaum xub thawj nws tsis kam tuav nkawd tes. Tab sis mas, nws mus hauv nws chav pw thiab rho nws cov nyiaj feem kaum uas nyob hauv ib lub me nyuam thawv uas nws tau khaws cia tau ntau xyoo lawm. Nws cev cov nyiaj feem kaum rau nws ob tug mus qhia tom tsev thiab hais tias, “Tsam no kuv thiaj nrog tus Tswv sib raug zoo lawm. Tam sim no kuv thiaj tsim nyog tuav tus Tswv ob tug tub qhe txhais tes!” Yav tom ntej Tij Laug Krause qhia kuv 3 tias tej ntawd raug nws lub siab heev vim nws xav tias tus tij laug uas rau siab nteeg no, uas tsis tau mus koom lub Koom Txoos tau ntau ntau xyoos, tseem tau mloog lus thiab tau khaws nws cov nyiaj ib feem kaum ntawm cov nyiaj uas nws khwv tau yuav them nws cov nyiaj feem kaum thiab. Nws tau muab khaws cia es yeej tsis paub thaum twg los sis yog tias nws yuav muaj cai them hlo li. Tij Laug Walter Krause tso lub neej no tseg li cuaj xyoo tas los lawm thaum nws muaj 94 xyoos. Nws tau rau siab ntseeg thiab mloog lus hauv tag nrho nws lub neej thiab tau txhawb pab kuv thiab txhua tus uas paub nws. Thaum twg nws raug txib kom ua hauj lwm, nws tsis ua xyem xyav, nws tsis tau yws yws li, thiab nws tsis tau keb li ub li nos. Kuv cov kwv tij thiab cov muam, txoj kev sim siab loj tshaj plaws hauv lub neej no yog kev mloog lus. Tus Tswv hais tias “Peb yuav xyuas seb, lawv puas kam ua txhua yam uas tus Tswv lawv tus Vajtswv txib lawv ua.” 10 Tus Cawm Seej hais tias: “Rau txhua tus uas tau ib txoj koob hmoov los ntawm kuv txhais tes yeej yog vim lawv tau ua raws li txoj kev cai uas teem tseg rau txoj koob hmoov ntawd, thiab tej kev cai ntawd, twb muab teem tseg puag ua ntej tsim ntuj tsim teb raug.” 11 Tsis muaj ib tug yam ntxwv txog kev mloog lus uas zoo tshaj peb tus Cawm Seej. Hais txog Nws Pov Lauj hais tias: “Txawm yog Yexus yog Vajtswv tus Tub los nws tseem kawm mloog lus los ntawm txoj kev uas tiv kev txom nyem; “Thaum Vajtswv ua rau nws zoo kawg nkaus lawm, nws thiaj yog tus uas pub txoj sia ntev dhawv mus ib txhis rau txhua tus uas mloog nws lus.” 12 Tus Cawm Seej qhia kev hlub tiag tiag thaum nws ua neej zoo tag nrho, thaum nws hwm txoj hauj lwm dawb ceev uas Nws raug txib los ua. Nws yeej tsis tau ua neeg khav theeb. Nws yeej tsis tau muaj siab hlob. Nws yeej tsis tau thim. Nws ib txwm ua siab mos siab muag. Nws ib txwm ua siab zoo. Nws ib txwm mloog lus. Txawm Nws raug kev ntxias los ntawm tus xib hwb ntawm kev dag, uas yog dab ntxwg nyoog, txawm Nws lub cev tau qaug zog tas vim nws tau yoo mov 40 hnub 40 hmo thiab tshaib plab heev, tas sis mas thaum tus dab phem muab yam khoom zoo tshaj plaws coj los ntxias Yexus, Nws yeej ua tus yam ntxwv zoo rau peb saib txog kev mloog lus vim Nws tsis kam thim ntawm qhov uas Nws paub yog qhov yog lawm.13 Thaum yuav raug tej kev txom nyeem hauv lub Vaj Khexemanes, nyob ntawd Nws raug mob kawg nkaus ces nws cov hws twb ua tej tee ntshav uas nrog mus hauv av,” 14 Nws ua tus yam ntxwv zoo txog tus Tub uas mloog lus hais tias, “Txiv, yog koj pom zoo, thov koj muab lub khob no tshem ntawm kuv mus. Txawm yog li cas los koj tsis txhob ua raws li kuv lub siab nyiam, tiam sis ua raws li koj lub siab nyiam xwb.” 15 Raws li tus Cawm Seej qhia Nws cov Thwj Tim thaum ub, Nws kuj qhia koj thiab kuv kom: “Los nrog kuv mus.” 16 Peb puas kam mloog lus? Qhov kev paub uas peb xav tau, cov lus teb uas peb xav txais, thiab lub dag zog uas peb xav tau niaj hnub nim no kom pab peb kov yeej tej teeb meem hauv lub ntiaj teb uas ib sij pauv no yuav yog peb li yog tias peb kam mloog lus thiab ua raws li tus Tswv cov lus txib. Kuv rov qab hais tus Tswv cov lus dua hais tias: “Tus uas ua raws li [Vajtswv] cov lus txib yuav txais qhov tseeb thiab qhov kaj, mus txog thaum nws tau yeeb koob hauv qhov tseeb thiab paub txog txhua yam tsav.” 17 Kuv txo hwj chim thov Vajtswv 4 kom peb yuav tau koob hmoov nplua mias uas tau cog lus tseg rau cov neeg uas mloog lus. Los ntawm Yexus Khetos, peb tus Tswv thiab peb tus Cawm Seej lub npe, amees. LUS CIM 1. “Kev Tseeb Yog Dab Tsi?” Hymns, naj npawb 272. 2. Lus Qhuab Qhia thiab Kev Khi Lus 93:24, 26–28. 3. 1 Xamuyees 15:22. 4. Lus Qhuab Qhia thiab Kev Khi Lus 64:34. 5. 1 Nifais 3:7. 6. Chiv Keeb 22:12. 7. Chiv Keeb 22:18. 8. Joseph F. Smith, “Discourse,” Deseret News, Kaum Ib Hlis Ntuj 12, 1873, 644. 9. Gordon B. Hinckley, “If Ye Be Willing and Obedient,” Ensign, Kaum Ob Hlis Ntuj 1971, 125. 10. Anplaham 3:25. 11. Lus Qhuab Qhia thiab Kev Khi Lus 132:5. 12. Henplais 5:8–9. 13. Saib Mathais 4:1–11. 14. Lukas 22:44. 15. Lukas 22:42. 16. Yauhas 21:22. 17. Lus Qhuab Qhia thiab Kev Khi Lus 93:28. Kev Qhia rau Peb lub Caij Nyoog T ej zaj lus qhia hauv pawg Pov Thawj Hwj Mekixedes thiab lub Koom Haum Niam Tsev tej kev sib ntsib thaum hnub Sunday thib plaub yuav yog tsom ntsoov tej “Kev Qhia rau Peb lub Caij Nyoog.” Txhua zaj lus qhia yus npaj tau los ntawm ib zaj los yog ob peb zaj lus hais los ntawm lub tuam rooj sab laj uas muaj tsis ntev tas los no (saib daim duab nram qab). Ceg txheem ntseeg thiab koog chaw cov thawj tswj hwm xaiv tau tej zaj lus hais uas tsim nyog siv, los yog lawv muab lub luag hauj lwm no so rau cov npis sov los yog ceg ntseeg cov thawj tswj hwm xaiv los tau thiab. Cov thawj coj hais lus txhawb nqa qhov uas cov kwv tij hauv pawg Pov Thawj Hwj Mekixedes thiab cov viv ncaus hauv lub Koom Haum Niam Tsev kawm tib cov lus hais thaum tib hnub Sunday. Tsim nyog cov mej zeej uas koom tej kev qhia no thaum hnub Sunday thib plaub kawm thiab nqa tuaj rau hoob kawm ntawv vaj lug kub tsab ntawv xov xwm uas muaj cov lus hais tom lub tuam rooj sab laj zaum tas los nyob haud. Tej Tswv Yim rau Kev Npaj ib zaj Lus Qhia los ntawm cov Lus Hais Thov Vajtswv kom tau tus Vaj Ntsuj Plig Dawb Huv nrog koj nyob thaum koj kawm thiab qhia txog cov lus hais. Tej zaum koj yuav xav npaj zaj lus qhia siv lwm yam ntaub ntawv xov xwm, tiam sis cov lus uas tau hais tom lub tuam rooj sab laj yog cov lus kawm uas lub koom txoos twb pom zoo rau lawm. Koj lub luag hauj lwm no yog kom pab lwm tus neeg kawm thiab ua neej raws li txoj moo zoo raws li tau qhia tawm hauv lub Koom Txoos lub tuam rooj sab laj uas tau muaj tsis ntev tas los no. Ke tshab xyuas cov lus hais ke nrhiav kom tau tej ntsiab cai thiab tej lus qhuab qhia uas yuav pab cov kawm zoo tshaj. Tsis tas li ntawd, ua tib zoo nrhiav kom tau tej dab neeg, tej nqes vaj lug kub, thiab tej lus los ntawm cov lus hais uas yuav pab koj qhia tej qhov tseeb no. Npaj ib tug txheej txheem qhia kev saib yuav ua li cas qhia tej ntsiab cai thiab tej lus qhuab qhia. Xav seb puas nug ib co lus uas yuav pab cov kawm: • Nrhiav kom tau tej ntsiab cai thiab tej lus qhuab qhia. • Xav saib tej ntawd lub ntsiab txhais li cas tiag. • Qhia tawm tej yam uas koj to taub, tej tswv yim, tej yam uas muaj los rau koj, thiab koj tej lus tim khawv txog tej no. • Qhia saib yuav ua li cas coj tej ntsiab cai thiab tej lus qhuab qhia no los mus siv hauv lawv lub neej. QHIA LUB HLIS TWG COV NTAUB NTAWV QHIA THAUM HNUB SUNDAY THIB PLAUB Plaub Hlis Ntuj 2012–Kaum Hli Ntuj 2013 Tej zaj lus uas tau hais nyob hauv lub tuam rooj sab laj thaum lub Plaub Hlis Ntuj xyoo 2013 * Kaum Hli Ntuj 2013–Plaub Hlis Ntuj 2014 Tej zaj lus uas tau hais nyob hauv lub tuam rooj sab laj thaum lub Kaum Hli Ntuj xyoo 2013 * * Thaum qhia hnub Sunday thib plaub hauv lub Plaub Hlis Ntuj thiab Kaum Hli Ntuj, xaiv tau tej zaj ntawm lub rooj sab laj tas los los yog lub rooj sab laj uas nyuam qhuav ua tiav lawm. Cov lus hais no muaj txawm peem ua ntau yam lus nyob rau ntawm conference.lds.org. 5 © 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/12. Pub txhais ua lus Hmoob: 6/12. Kev txhais lus rau First Presidency Message, May 2013. Hmong. 10665 295 C O V M U S S A I B X Y U A S T O M T S E V T S A B X O V, T S I B H L I S N T U J 2 0 1 3 Los ntawm Thawj Tswj Hwm Henry B. Eyring Tus Pab Cuam thib Ib hauv Thawj Pawg Thawj Tswj Hwm “Los Cuag Kuv” Los ntawm Nws cov lus thiab tus yam ntxwv, tus Khetos tau qhia peb paub txav los nyob ze Nws. K uv zoo siab nrog nej nyob hauv lub rooj sab laj ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Nov yog Nws lub Koom Txoos. Peb tuav Nws lub npe thaum peb nkag los hauv Nws lub nceeg vaj. Nws yog Vajtswv, tus uas Tsim peb, thiab nws zoo tag nrho. Peb yog neeg uas txawj tuag thiab txaw ua txhaum. Txawm li ntawd los Nws caw peb los cuag Nws los ntawm Nws txoj kev hlub peb thiab peb tsev neeg. Nov yog nws cov lus: “Txav los nyob ze kuv ces kuv yuav txav los nyob ze nej; rau siab ntso nrhiav kuv ces nej yuav pom kuv; thov, ces nej yuav tau txais; khob, ces yuav qhib rau nej.” 1 Thaum lub caij Easter no peb nco qab vim li cas peb hlub Nws thiab qhov uas Nws cog lus rau Nws cov thwj tim uas rau siab ntseeg hais tias lawv yog Nws cov phooj ywg Tus Cawm Seej cog lus thiab qhia peb tias thaum peb ua Nws txoj hauj lwm, Nws yuav los cuag peb. Ib txoj kev tshwm sim uas tau muab rau Oliver Cowdery thaum nws ua tus Tswv tej hauj lwm nrog tus Yaj Saub Yauxej Xamiv txhais Phau Ntawv Maumoos hais tias: “Saib seb, koj yog Oliver, thiab kuv tau hais lus rau koj vim yog tej uas koj xav tau; yog li ntawd khaws tej lus no cia rau hauv koj lub siab. Rau siab ntseeg thiab mob siab coj Vajtswv tej lus txib, thiab kuv yuav muab ob txhais npab ntawm kuv txoj kev hlub puag khawm koj.” 2 Kuv muaj kev xyiv fab thaum kuv txav los nyob ze tus Cawm Seej thiab Nws txav los nyob ze kuv dhau feem ntau yog los ntawm tej yam me me uas kuv ua kom yus ua raws li cov lub txib. Tej no tau tshwm sim rau nej. Tej zaum nej ua li ntawd thaum nej mus koom ib txoj kev sib ntsib txais lub cim nco txog. Thaum kuv tseem hluas tej ntawd tau tshwm sim rau kuv thaum Hnub Caiv. Thaum ntawd peb tau txais lub cim nco txog nyob hauv ib txoj kev sib ntsib thaum hmo ntuj. Kuv tseem nco txog ib hnub 65 xyoos tas los, thaum kuv ua raws li lo lus txib kom kuv koom nrog kuv tsev neeg thiab Haiv Neeg Ntseeg, uas tseem ua rau kuv txav los nyob ze tus Cawm Seej. Thaum ntawd twb tsaus ntuj thiab no no. Tiam sis kuv nco qab tias nws ci ntsa iab thiab sov sov nyob hauv 1 lub tsev teev ntuj. Peb tau txais lub cim nco txog ntawm cov uas tuav lub Pov Thawj Hwj Aloos, thiab khi lus nrog peb Leej Txiv Saum Ntuj Ceeb Tsheej kom nco txog Nws Leej Tub thiab ua raws li Nws cov lus txib. Thaum kev sib ntsib kawg peb hu nkauj zaj nkauj “Nyob Nrog Nraim Kuv; Twb Tsaus Ntuj Lawm” uas muaj cov lus no hais tias “Cawm Seej, nyob nrog nraim kuv hmo no.” 3 Hmo ntawd kuv tau hnov tus Cawm Seej txoj kev hlub. Thiab tus Vaj Ntsuj Plig Dawb Huv txoj kev nplij siab. Kuv xav rov qab hnov txoj kev hlub tus Cawm Seej thiab kom Nws txav los nyob ze kuv zoo li thaum kuv nyob hauv kev sib ntsib txais lub cim nco txog ntawd. Tsis ntev tas los kuv tau ua raws li ib lo lus txib ntxiv. Kuv tau kawm cov vaj lug kub. Los ntawm cov vaj lug kub, kuv paub tias tus Vaj Ntsuj Plig Dawb Huv yuav qhia kuv paub tias ob tug thwj tim ntawm tus Tswv tau xav li cas thaum Nws rov qab mus rau nkawd tsev thiab nrog nkawd nyob. Kuv tau nyeem txog hnub peb tom qab Nws raug ntsia saum ntoo khaub lig. Cov poj niam rau siab ntseeg thiab lwm tus pom daim txiag zeb uas npog lub rooj ntxas twb dov rau ib cag lawm thiab Nws lub cev tsis nyob ntawd. Lawv tuaj pleev tshuaj rau Nws lub cev vim lawv hlub Nws. Ob tug tim tswv nyob ze thiab nug yog vim li cas lawv ntshai hais tias: “Vim li cas nej nrhiav tus neeg ciaj ntawm cov neeg tuag no? “Nws tsis nyob ntawm no; nws twb sawv lawm. Nej nco ntsoov tej lus uas nws hais rau nej, thaum nej tseem nyob pem lub xeev Kalilais hais tias, “Yeej yuav muaj neeg ntes Neeg Leej Tub coj mus rau cov neeg txhaum, muab nws ntsia rau saum ntoo khaub lig thiab peb hnub tom qab, nws yuav sawv rov los.” 4 Nyob hauv phau Malakaus nws sau ib co lus ntxiv los ntawm ib tug tim tswv hais tias: “Nej cia li rov qab mus qhia rau nws cov thwj tim thiab hais rau Petus hais tias, Nws yuav ua nej ntej mus rau pem Kalilais, nej yuav ntsib nws ped raws li nws tau qhia rau nej lawm.” 5 Cov Thwj Tim tau sib sau ua ke nyob hauv Yeluxalees. Lawv ntshai thiab xav tsis thoob thaum lawv hais lus ua ke txog qhov uas lawv hnov xov tias Nws sawv rov los lawm. Thaum tav su ntawd ob tug thwj tim tau taug kev los ntawm Yeluxalees mus rau Ema-us. Tus Khetos sawv rov los tshwm sim rau nkawd ntawm txoj kev thiab taug kev nrog nkawd. Tus Tswv tau los rau nkawd. Phau Lukas qhia peb tias nkawd txoj kev mus zoo li cas: “Thaum nkawd tseem sib tham thiab sib nug txog zaj ntawd, Yexus txawm los nrog nkawd taug kev mus. “Nkawd pom Yexus, tiam sis zoo li muaj tej yam ua rau nkawd cim tsis tau nws. Yexus nug nkawd hais tias, “Neb pheej sib tham dab tsi thaum neb taug kev?” Nkawd nres ua ntsej muag mluas mlob. “Ob tug ntawd, tus uas hu ua Kelupas, nug Yexus hais tias, Tag nrho cov neeg uas nyob hauv lub nroog Yeluxalees puav leej paub tej uas nyuam qhuav muaj tau ob peb hnub los no huv tib si, tsuas yog koj tib leeg thiaj tsis paub tej ntawd xwb los?” 6 Nkawd qhia Nws txog nkawd txoj kev tu siab uas Yexus tuag thaum nkawd ntseeg tias Nws yog tus uas yuav Txhiv Ixayees Dim. Nyaj muaj kev hlub hauv tus Tswv lub suab thaum Nws hais lus rau ob tug thwj tim nyuaj siab no: “Ces Yexus hais rau nkawd hais tias, Ua li cas neb yuav ruam ua luaj li, ua li cas neb tsis ntseeg tej uas cov yaj saub tau qhia tseg lawm: “Puas yog tus Khetos yeej yuav raug tsim txom thiab tom qab ntawd nws yuav tau nws lub yeeb koob? “Yexus txawm piav Vajtswv Txoj Lus uas hais txog nws, nws xub pib qhia tej uas Mauxes sau thiab tej uas cov cev Vajtswv lus txhua tus sau tseg lawm.” 7 Ces muaj ib lub sij hawm uas ua rau kuv lub siab sov so txij thaum kuv yog ib tug me nyuam tub los: “Thaum lawv mus yuav txog lub zos uas lawv mus ntawd, Yexus txawm ua li nws yuav dhau plaws mus. “Tiam sis nkawd cheem hais tias, Nrog wb so ntawm no, rau qhov twb yuav tsaus ntuj thiab hnub yuav poob. Yexus thiaj mus nrog nkawd so.” 8 Hmo ntawd tus Cawm Seej nkag mus hauv Nws cov thwj tim lub tsev nyob ze lub zos Ema-us. Nws nrog nkawd noj nqaij. Nws muab cov mov mog foom koob hmoov thiab ntais cev rau nkawd. Nkawd qhov muag txawm qhib kom nkawd paub Nws. Ces Nws txawm ploj ntais ntawm nkawd mus lawm. Lukas sau hais tias ob tug thwj tim tau xav li cas hais tias: “Nkawd sib tham hais tias, Thaum peb taug kev tuaj, nws nrog wb tham thiab piav Vajtswv Txoj Lus rau wb mloog, mas wb lub siab kub lug cuag li hluav taws hlawv puas yog?” 9 Thaum tib lub sij hawm ntawd ob tug thwj tim khiav rov qab mus rau Yeluxalees qhia kaum ib tug Thwj Tim txog qhov no. Thaum lub sij hawm ntawd tus Cawm Seej tshwm sim dua. Nws qhia lawv txog tej uas cov yaj saub hais txog Nws lub luag hauj lwm theej tag nrho Nws Leej Txiv cov me nyuam lub txhoj thiab tu txoj kev tuag tej hlua. “Thiab Yexus hais rau lawv hais tias, Twb muaj lus sau tseg lawm hais tias, tus Mexiyas yeej yuav raug kev tsim txom thiab peb hnub tom qab, nws yuav sawv hauv qhov tuag rov qab los 2 “Nej yuav tsum tuav nws lub npe mus qhia txoj moo zoo rau txhua haiv neeg hauv qab ntuj no hais tias, Vajtswv yuav zam txim rau tus uas tso nws tej kev txhaum tseg. Nej cia li pib qhia hauv lub nroog Yeluxalees. “Thiab nej ua tim khawv txog tej no rau sawv daws paub.” 10 Tus Cawm Seej hais tej lus tseeb no rau peb ib yam li Nws hais rau Nws cov thwj tim. Peb ua tim khawv txog tej no. Thiab tus yaj saub Amas tau qhia txog kev txib uas peb tau txais thaum peb ua kev cai raus dej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. “Thiab tau muaj tias nws tau hais rau lawv tias: Saib seb, ntawm no yog cov dej Maumoos . . . thiab nim no, li uas nej xav los rau hauv Vajtswv pab, thiab hu ua nws cov neeg, thiab ib leeg txaus siab ris ib leeg tej nra, xwv kom lawv thiaj li yuav sib; “Muaj tseeb tiag, thiab txaus siab nyuaj siab nrog cov uas nyuaj siab; muaj tseeb tiag, thiab nplij cov uas xav tau txoj kev nplij siab, thiab sawv ua Vajtswv tej tim khawv rau txhua lub caij nyoog thiab rau tag nrho txhua txhia yam, thiab nyob tag nrho txhua qhov chaw uas nej yuav nyob, kom mus txog thaum tuag, xwv kom nej yuav raug txhiv dim los ntawm Vajtswv, thiab raug suav nrog cov uas nyob hauv thawj txoj kev sawv hauv qhov tuag rov qab los, xwv kom nej yuav tau txoj sia nyob mus ib txhis— “Nim no kuv hais rau nej tias, yog tias qhov no yog yam uas nej tej siab xav tau, ces nej tseem yuav muaj dab tsi thaiv qhov uas ua kev cai raus dej nyob hauv tus Tswv lub npe, kom ua ib qhov tim khawv rau nws tias nej tau khi ib lo lus sib khi nrog nws, tias nej yuav ua hauj lwm rau nws thiab coj nws tej lus txib, xwv kom nws yuav nchuav nws tus Ntsuj Plig nplua mias rau ntxiv saum nej? “Thiab nim no thaum cov neeg tau hnov tej lus no, lawv tau npuaj lawv tej tes rau kev xyiv fab, thiab qw hais tias: Qhov no yog qhov uas peb tej siab xav tau.” 11 Peb tau khi lus tias peb yuav txhawb nqa cov uas xav tau thiab ua tim khawv txog tus Cawm Seej tas peb lub neej. Peb yuav muaj peev xwm ua li ntawd tsuas yog peb hlub tus Cawm Seej thiab hnov Nws txoj kev hlub peb. Thaum peb ua raws li peb tej lus cog tseg, peb yuav paub tias peb hlub Nws. Peb txoj kev hlub Nws yuav loj tuaj vim peb yuav hnov tau Nws lub hwj chim thiab txav los nyob ze ua Nws tej hauj lwm. Thawj Tswj Hwm Thomas S. Monson ua rau peb nco qab txog tus Tswv txoj kev cog lus rau Nws cov thwj tim: “Thiab yog leej twg txais yuav nej, kuv kuj yuav nyob ntawd thiab, vim kuv yuav ua nej ntej mus. Kuv yuav nyob ntawm nej sab xis thiab nyob ntawm nej sab laug, thiab kuv Leej Ntsuj Plig yuav nyob hauv nej tej siab, thiab kuv cov tim tswv nyob ib puag ncig nej, los txhawb nqa nej.” 12 Muaj ib txoj kev ntxiv uas peb tau hnov Nws txav los nyob ze peb. Thaum peb ua Nws tej hauj lwm, Nws txav los nyob ze cov uas peb hlub hauv peb tsev neeg. Txhua lub sij hawm uas tus Tswv hu kuv ua Nws txoj hauj lwm nyob deb ntawm kuv tsev neeg, kuv tau kawm hais tias tus Tswv foom koob hmoov rau kuv tus poj niam thiab kuv cov me nyuam. Nws tau npaj Nws cov tub qhe zoo thiab npaj tej cib fim kom kuv tsev neeg txav los nyob ze Nws. Nej tau muaj tib txoj koob hmoov ntawd nyob hauv nej lub neej. Nej feem coob muaj cov uas nej hlub uas tsis taug txoj kev mus rau txoj siab nyob ib txhis. Nej xav paub seb nej yuav ua li cas kom lawv rov qab los. Thaum nej rau siab ntseeg ua Nws tej hauj lwm, tus Tswv yuav txav los nyob ze lawv. Nej nco qab tus Tswv cov lus cog tseg rau Yauxej Xamiv thiab Sidney Rigdon thaum nkawd nyob deb ntawm nkawd tsev neeg ua tus Tswv tej hauj lwm hais tias: “Kuv ob tug phooj ywg Sidney thiab Yauxej, nej tsev neeg nyob zoo; lawv nyob hauv kuv txhais tes, thiab kuv yuav ua rau lawv li kuv pom zoo; vim muaj tag nrho tej hwj chim nyob ntawm kuv.” 13 Ib yam li Amas thiab tus Vaj Ntxwv Mauxiyas, ib txhia ntawm nej cov niam tsev txiv tsev uas tau ua hauj lwm zoo rau tus Tswv tau ntev muaj cov me nyuam uas ua loj leeb txawm lawv niam lawv txiv ua tus Tswv tej hauj lwm. Lawv tau ua txhua yam lawv ua tau, kuj muaj phooj ywg uas rau siab pab thiab. Amas thiab Haiv Neeg Ntseeg hauv nws lub caij nyoog thov Vajtswv rau nws tus tub thiab Vaj Ntxwv Mauxiyas. Ib tug tim tswv tau los. Nej tej kev thov Vajtswv thiab kev thov ntawm cov uas muaj siab ntseeg yuav coj tus Tswv cov tub qhe pab nej tsev neeg thiab. Lawv yuav pab nej cov me nyuam rov qab mus tsev rau Vajtswv, txawm Dab Ntxwg Nyoog thiab cov uas lawv nws qab tawm tsam lawv; Dab Ntxwg Nyoog lub hom phiaj yog ua rau cov tsev neeg puas tsuaj nyob hauv lub neej no thiab nyob mus ib txhis. Nej nco txog cov lus uas tus tim tswv hais rau Amas tus Hluas thiab Mauxiyas cov tub thaum lawv ntxeev siab hais tias: “Saib seb, tus Tswv tau hnov nws cov neeg tej lus thov, thiab kuj hnov tej lus thov ntawm nws tus tub qhe, Amas, tus uas yog koj txiv; vim nws tau thov nrog tej kev ntseeg ntau heev txog koj xwv kom koj yuav raug coj los mus paub qhov tseeb; yog li ntawd, vim lub ntsiab no kuv thiaj tau los ua kom koj paub txog Vajtswv lub hwj chim thiab txoj cai, xwv kom nws tej tub qhe tej lus thov yuav raug teb raws li lawv tej kev ntseeg.” 14 Kuv tsis cog lus rau nej cov uas thov Vajtswv thiab ua tus Tswv tej hauj lwm hais tias nej yuav txais txhua txoj koob hmoov uas nej thiab nej tsev neeg xav tau. Tiam sis kuv cog lus tias tus Cawm Seej yuav txav los nyob ze nej thiab foom koob hmoov uas zoo rau nej thiab nej tsev neeg. Nej yuav muaj kev nplij siab los ntawm Nws txoj kev hlub thiab paub tias Nws txav los nyob ze nej thaum nej ncav tes pab lwm tus. Thaum nej txhawb nqa 3 cov uas xav tau kev pab thiab muab tus Tswv txoj Kev Theej Txhoj ntxuav kev txhaum mus ntawm cov uas tu siab, ces tus Tswv lub hwj chim yuav txhawb nqa nej. Nws cev tes pab nej tsom kwm thiab foom koob hmoov rau peb Leej Txiv Saum Ntuj Ceeb Tsheej cov me nyuam, tsis hais cov nyob hauv nej tsev neeg los yog. Vajtswv npaj tej yam zoo kawg nkaus rau peb thaum peb rov qab mus tsev. Thaum ntawd peb yuav pom tias yuav muaj raws li tus Tswv cog lus rau peb. Nws yog tus uas tos txais peb muaj txoj sia nyob mus ib txhis nrog Nws thiab peb Leej Txiv Saum Ntuj Ceeb Tsheej. Yexus Khetos piav txog qhov no hais tias: “Nrhiav kom pab coj thiab tsa kuv lub Xi-oos. Coj kuv tej lus txib nyob hauv txhua yam tsav “Thiab, yog hais tias koj coj kuv tej lus txib thiab nyiaj mus kom txog thaum kawg ces koj yuav tau txoj sia nyob mus ib txhis, uas yog lub txiaj ntsim zoo tshaj plaws ntawm tag nrho Vajtswv tej txiaj ntsim.” 15 “Vim cov uas muaj sia nyob yuav tau lub ntiaj teb ua lawv tug, thiab cov uas tuag lawm yuav tau so ntawm tag nrho lawv tej kev khwv, thiab lawv tej hauj lwm yuav raws lawv qab; thiab lawv yuav tau txais ib lub meej mom nyob saum kuv Txiv tej chaw nyob, uas kuv tau npaj rau lawv.” 16 Kuv ua tim khawv tias los ntawm tus Ntsuj Plig peb yuav ua raws li Leej Txiv Saum Ntuj Ceeb Tsheej txoj kev caw peb hais tias: “Nov yog Kuv Leej Tub uas Kuv Hlub. Cia li mloog Nws hais!” 17 Los ntawm Nws cov lus thiab tus yam ntxwv, tus Khetos tau qhia peb paub txav los nyob ze Nws. Leej Txiv Saum Ntuj Ceeb Tsheej txhua tus me nyuam uas tau xaiv ua kev cai raus dej koom Nws lub Koom Txoos, yuav muaj cib fim hauv lub neej no kawm Nws txoj moo zoo thiab Nws cov tub qhe yuav caw lawv “Los cuag kuv.” 18 Tus Ntsuj Plig yuav coj Nws txhua tus tub qhe nyob hauv Nws lub nceeg vaj hauv lub ntiaj teb no, thiab nyob hauv lub ntuj ntsuj plig thaum lawv foom koob hmoov thiab pab lwm tus. Ces lawv yuav hnov Nws txoj kev hlub thiab muaj kev xyiv fab los ntawm qhov uas lawv txav los nyob ze Nws. Kuv ua tim khawv tias kuv paub tseeb txog tus Tswv txoj Kev Sawv Rov Los zoo ib yam li kuv twb nyob nrog ob tug thwj tim hauv lub tsev ntawm ntug kev mus rau Ema-us. Kuv paub tias Nws muaj txoj sia nyob ib yam li Yauxej Xamiv paub thaum nws pom Leej Txiv thiab Leej Tub ib tag kis ci ntsa iab hauv ib koog ntoo nyob hauv Palmyra. Nyov yog Yexus Khetos lub Koom Txoos tseeb. Thawj Tswj Hwm Thomas S. Monson tuav tib cov yuam sij pov thawj hwj uas muaj hwj chim khi peb ua kev hauv peb tsev neeg peb thiaj yuav nyob nrog peb Leej Txiv Saum Ntuj Ceeb Tsheej thiab tus Tswv Yexus Khetos mus ib txhis. Thaum txog Hnub Txiav Txim peb yuav sawv ntawm tus Cawm Seej tim ntsej tim muag. Cov uas tau ua Nws tej hauj lwm hauv lub neej no kom txav los nyob ze Nws yuav xyiv fab heev. Thaum lawv hnov cov lus no hais tias: “Tus tub qhe zoo thiab ncaj ncees, koj ua zoo lawm,” lawv yuav xyiv fab heev.19 Kuv ua tim khawv txog tus Cawm Seej uas sawv rov los thiab peb tus Txhiv Dim los ntawm Yexus Khetos lub npe, amees. LUS CIM 1. Lus Qhuab Qhia thiab Kev Khi Lus 88:63. 2. Lus Qhuab Qhia thiab Kev Khi Lus 6:20. 3. “Abide with Me; ’Tis Eventide,” Hymns, naj npawb 165. 4. Lukas 24:5–7. 5. Malakaus 16:7. 6. Lukas 24:15–18. 7. Lukas 24:25–27. 8. Lukas 24:28–29. 9. Lukas 24:32. 10. Lukas 24:46–48. 11. Mauxiyas 18:8–11. 12. Lus Qhuab Qhia thiab Kev Khi Lus 84:88. 13. Lus Qhuab Qhia thiab Kev Khi Lus 100:1. 14. Mauxiyas 27:14. 15. Lus Qhuab Qhia thiab Kev Khi Lus 14:6–7. 16. Lus Qhuab Qhia thiab Kev Khi Lus 59:2. 17. Joseph Smith—History 1:17. 18. Mathais 11:28. 19. Mathais 25:21. © 2013 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus As Kiv: 6/12. Pub txhais ua lus Hmoob: 6/12. Kev txhais lus rau Visiting Teaching Message, May 2013. Hmong. 10665 295 4