Połnomóc za docasne staranje, wótwardowańske a pacientowe

Połnomóc za docasne staranje, wótwardowańske a pacientowe póstajenje
Chto rozsuźijo, ga a kak?
Lube bergarki a bergarje,
Z nowym nakładom brošury informěrujomy wó pšawniskich
móžnosćach docasnego staranja. Wušej togo ma brošura
musterowe formulary, kótarež zmóžniju indiwiduelne
wugótowanje połnomócy abo póstajenja pó swójskich
pótrěbnosćach.
Z pśiběrajucym starstwom pówušyjo se riziko, w paźe
chórosći a pótrjeby wótwardowanja nic wěcej we połnej
rozměrje móc rozsuźiś a jadnaś. Njepśewóstajśo
pśigóźbje, chto pótom rědujo Waše pšawniske
nastupnosći. Aby mógali byś sebje wěste, až w paźe njezamóžnosći rozsuźenja a zwólenja Waše wěcy su tak rědowane,
ako Wy sebje to žycyśo, dejali se w strowych dnjach wó to docasnje staraś.
Zawcasa se staraś wó wěcy, kenž njedaju se pśedpowěźeś, ako chórosć, njegluka, abo pśez starstwo zawinowana
zbrašnosć – to wótbłyšćujo wót sebje póstajone a wósobinski zagronite jadnanje.
Kótara móžnosć docasnego staranja se wuzwólijo, wótwisujo w jadnotliwem paźe wót wšakorakich pśemyslenjow:
Połnomóc za docasne staranje se pśiraźijo, gaž dajo we Wašom krejzu pśiswójźbnych abo pśijaśelow absolutnje dowěry
gódne paršony, kenž su zwólniwe, Wam pśi nastawajucej bźezmócnosći daś trěbnu pódpěru, a kenž pśi tom njepótrjebuju
kontrolu pśez wótwardowańske sudnistwo.
Wótwardowańske póstajenje by dejało se pśecej zawobmysliś, gaž w paźe pózdźejšeje bźezmócnosći njedajo se
wósebneje dowěry gódna paršona społnomócniś a pśez to musy se wobstaraŕ wót wótwardowańskego sudnistwa póstajiś.
Z wótwardowańskim póstajenim wustajiśo, kak dej se Wašo žywjenje pód takimi wobstojnosćami wugótowaś. Tyjo-li to
Wašomu derjeměśeju, jo wustajony wobstaraŕ kazniski zawězany, se pó Wašych žycenjach měś.
Z pacientowym póstajenim se docasa staraśo za ten pad, gaž njejsćo wěcej zamóžne se same zwurazniś, aby se pśi
medicinskim gójenju na Waše směrnice glědało. Pacientowe póstajenja słuže za wětšy źěl ako wudopołnjenje k
połnomócam za docasne staranje abo k wótwardowańskim póstajenjam.
Gaž sćo sebje njewěste w jadnotliwych pšašanjach abo gaž se zjawiju komplicěrowane problemy, dejali se we kuždem
paźe wobradowaś daś wót pšawiznika abo notarja. Informacije dostanjośo teke pśi wótwardowańskich zastojnstwach a pśi
wótwardowańskich towaristwach, kenž źěłaju we Wašom měsće abo regionje.
Waš
dr. Helmuth Markov
ministaŕ za justicu kraja Bramborska
Ministerium der Justiz des Landes Brandenburg, Heinrich-Mann-Alle 107, 14473 Potsdam, Telefon: 0331 / 866-0
www.mdj.brandenburg.de