360 Colborne Street Saint Paul, MN 55102
Transkrypt
360 Colborne Street Saint Paul, MN 55102
Independent School District 625 Office of the Superintendent 360 Colborne Street Saint Paul, MN 55102-3299 Valeria S. Silva Superintendent of Schools Telephone: 651-767-8152 Fax: 651-767-3441 www.spps.org Hawm Txog Cov Tsev Neeg, Lub caij ntuj no no yog ib lub caij uas no heev! Nyob rau hauv tsev kawm ntawv daim ntawv teev sij hawm, peb yeej npaj li tsib hnub tshaj rau cov hnub kawm ntawv lawm kom txawm hais tias tsev kawm ntawv kaw los peb tsis txhob tau ntxiv cov hnub kawm ntawv ntxiv rau. Tiam sis, raws li nej twb paub lawm, xyoo no lub caij ntuj no no huab cua phem heev thiaj ua rau peb tau kaw tsev kawm ntawv txog rau hnub. Yuav kom puv cov hnub kawm ntawv hauv ib lub xyoos raws li lub xeev no tau teev tseg, peb thiaj yuav tsum tau ntxiv ib hnub ntxiv rau cov hnub kawm ntawv. Tam sim no nej feem coob twb hnov lawm hais tias lub Rau Hli ntuj hnub tim 9 yog hnub uas Tsoom Fwv Tsev Kawm Ntawv Nroog Xees Phos tau muab los ntxiv rau cov hnub kawm ntawv hauv lub xyoo kawm ntawv no (make-up day). Nyob rau hnub no, cov tub ntxhais kawm ntawv thiaj yuav kawm puv tas nrho cov hnub raws li lub xeev no tau teev tseg rau ib lub xyoos kawm ntawv. Hnub no los kuj yog hnub kawg ntawm peb kev kawm ntawv rau lub xyoo kawm ntawv no thiab. Vim Li Cas Thiaj Xaiv Lub Rau Hli Ntuj Hnub Tim 9? Peb paub hais tias qhov kev txiav txim siab no qee tsev neeg thiab qee tus neeg ua hauj lwm yeej tsis nyiam, peb thov txim. Yog hais tias peb muaj lwm txoj kev xaiv zoo dua ces peb twb xaiv lawm. Peb tau txiav txim siab xaiv lub Rau Hli ntuj hnub tim 9 vim li nram no. Nej feem coob hais tias kom cia cov tub ntxhais tuaj kawm ntawv ib hnub ntawm ob hnub uas cov xib hwb muaj kev kawm pab ntxiv rau lawv tes dej num (Lub Peb Hlis ntuj hnub tim 3 thiab lub Plaub Hlis ntuj hnub tim 18). Qhov no hais mas yooj yim, tiam sis nws kuj tsis yooj yim raws li xav: — Lub Peb Hlis ntuj hnub tim 3 ti dhau lawm, cov neeg ua dej num los sis cov tsev neeg yuav tsis muaj sij hawm txaus los mus npaj. — Lub Plaub Hlis ntuj hnub tim 18 tsis zoo rau txhua lub tsev kawm ntawv. Vim hais tias nyob rau hauv ib txhia tsev kawm ntawv, cov xib hwb twb muaj kev kawm pab ntxiv rau lawv tes dej num ua ntej hauv lub xyoo no lawm thiab lawv yuav tsis ua hauj lwm rau hnub tim 18 lub Plaub Hlis ntuj. Tshuav ob txoj kev xaiv lawm xwb xws li muab lub lim tiam so thaum lub caij nplooj ntoos hlav txo kom luv zog los sis ntxiv ib hnub ntxiv rau lub xyoo kawm ntawv no: Xws li Lub Rau Hli ntuj hnub tim 9. Qhov twg los puav leej tsis zoo, yog li peb thiaj tau xaiv qhov kom cov tsev neeg muaj sij hawm ntau zog los mus npaj. Lwm qhov tseeb txog kev ntxiv hnub tim 9 lub Rau Hli ntuj (make-up day) rau lub xyoo kawm ntawv no: Peb to taub hais tias tej zaum cov tsev neeg twb npaj ua lwm yam rau thaum lub caij ntuj so los sis twb npaj tawm rooj rau thaum lub Rau Hli ntuj hnub tim 9 lawm. Yog li no, ib txhia tub ntxhais yuav mus kawm tsis tau ntawv rau hnub ntawd. Yog hais tias nej tus me nyuam mus kawm tsis tau ntawv rau hnub ntawd, nej yuav tsum tau ua raws li nej tus me nyuam lub tsev kawm ntawv cov cai es hu mus qhia rau tsev kawm ntawv kom zam rau nej tus me nyuam. Ib qho ntxiv: Cov koob tsheej txais daim ntawv pov thawj kawm tiav yuav muaj raws li cov hnub uas twb tau teev tseg lawm. Hnub kawg ntawm kev kawm ntawv rau cov qib kaum ob yog hnub tim 30 lub Tsib Hlis ntuj, qhov no yuav nyob li qub tsis muaj dab tsi hloov. Cov me nyuam uas kawm qib PreK yuav tsis muaj kawm ntawv rau thaum lub Rau Hli ntuj hnub tim 9. (Qhov no tsis xam cov me nyuam kawm ntawv hauv Crossroad, cov uas kawm hauv Crossroads yuav muaj kawm ntawv li niaj zaus.) Discovery Club yuav qhib rau lub Rau Hli ntuj hnub tim 9, ib yam li ib hnub uas muaj kawm ntawv. Lub caij ntuj no hauv Minnesota no, no heev. Ua nej tsaug uas nej tau ua lub siab ntev. Ntawm Lub Siab Dawb Paug, Valeria Silva, Superintendent