ZAJ 26: NIAM TXIV KEV COB TUB KI.
Transkrypt
ZAJ 26: NIAM TXIV KEV COB TUB KI.
ZAJ 26: NIAM TXIV KEV COB TUB KI. Lo lus peb muab cov me nyuam hu ua Laib. Yog cov ua niam ua txiv muab 50% rau mas lawv mam mus ua Laib: 1. Cov niam txiv lawv tsis paub tias yog lawv tau muab qhov 50% rau lawv cov me nyuam ces lawv cov me nyuam mam li mus ua Laib. Muab siab rau nyeem cov lo lus nram qab no. 2. Yus yog niam yog txiv, 2-Niam txiv yog thawj tug xib hwb xub qhia hais lus rau me nyuam.3-Niam txiv yog thawj tus txiav txim rau me nyuam tias nws txhaum los tsis txhaum. 4-Niam txiv yog tus tswv muab nyiaj rau siv, muab mov rau noj. Yus ua niam ua txiv yus muaj cai npaum no. Tshuav ib yam uas niam txiv tsis nco paub txog. 3. Yog nrog me nyuam ua nws tus phooj ywg. Koj ua nws tus phooj ywg kom zoo tshaj mas nws mam kam qhia tej yam nws xav los nws tau ua rau koj. Koj tsis yog nws phooj ywg ces nws yeem mus qhia nws cov phooj ywg sab nraud. Tus phooj ywg yog kev tso siab loj tshaj plaws. Lo lus hais tias cov niam txiv muab 50% rau me nyuam, nws mam mus ua Laib: 1. Koj tus me nyuam yug los yam zoo nyob hauv nws twb muaj li 70% qhov zoo lawm. 30% ntawd, yog nws tsis tau kawm paub, los nws tsis tau hnov txog tias muaj dab tsis yuav los txog nws tus kheej. Me nyuam muaj phooj ywg nws mus kawm tau 20% ntawm nws cov phooj ywg los. Ces nws mam muaj 50% qhov tsis zoo, tab sis tsis paub tseeb tias nws puas tau nyiam thiab ua li ntawd. Hmoob lo lus hais tias. Luag tsaj ces lam nrog luag tsaj kom yus tsis txhob txaj xwb. Yus cov ua niam ua txiv yus cia li liam tias nws ua Laib, tej lus no ua kom me nyuam tsis txaus siab. Me nyuam xav tias nws twb phem lawm ces nws tsis muaj nqi dab tsi li. Nws tsis xav kho nws ntxiv. 2. Koj tus me nyuam pom nws tej phooj ywg muaj tej yam nws xav yuav, los sis nyob tom tsev kawm ntawv lub tsev txoj cai kom cov me nyuam rau tej hom khau los hnav tej hom tsho kom sib xws. Yus tsis yuav rau luag tej yog nws phooj ywg muaj nws tsis muaj nws tu siab, tsis muaj siab kawm ntawv. Cov ua niam ua txiv pheej hais tias nws tub nkeeg tsis xav kawm ntawv. Koj ua li no ces me nyuam lam nrog luag mus kawm ntawv xwb nws tsis nkag hauv lub tsev ntawv, nws mus dhau kiag lub tsev ntawv nws tej phooj ywg tawm los nws kuj mam los thiab. Luag tej mus kawm ntawv hos yus tus me nyuam nws mus kawm tau dab ntub, kawm kab ntsaum nroj tsuag tej xwm. Vim yus cov ua niam ua txiv, yus tsis pab tsis qhuas tej me nyuam. Ces lawv tas kev cia siab lawm. Thaij hais tias thaum me nyuam mus ua laib ntawd ces yog yus cov ua niam ua txiv muab qhov 50%rau nws. Nws muaj30% tsis zoo, uas nws tsis tau paub txog ntawd, nws kawm tau 20% ntawm nws cov phooj ywg. Yus yog niam txiv muab 50 % rau nws, ces nws mam muaj 100%. Nws thiaj txiav txim siab mus ua Laib. 3. Koj tus me nyuam, Thaum koj coj nws mus kawm ntawv, koj qhia kom nws mus zaum lub rooj ob los lub peb kom ze tus xib hwb me ntsis xwb thiaj zoo. Nws pom tus xib hwb zoo, nws pom ob peb leeg nyob ntawm nws hauv ntej xwb mas nws kawm tau tej yam phem uas nws cov phooj ywg ua kom tsawg me ntsis, kom nws paub txog xwb mas thiaj zoo. Yog nws zaum lub ib mas pom tus xib hwb xwb kuj zoo tsis txaus.nws tsis pom lwm yam, cuag li nws ruam dhau lawm thiab. Koj cia nws mus zaum lub rooj kawg ces nws kawm tau tas nrho tej yam cov phooj ywg sawv daws ua: Tus hlev nplaig los tus ntxi muag, tus zij ncaug, tus hom khauj tsiav, tus tsa nrig, tsa taws huv si ces nws tsis pom tus xib hwb thiab hnov cov lus xib hwb hais zoo. Ib tsam nws ua nws cov hauj lwm [ de voir, los homework] tsis tau vim nws twb sab tas rau tej nws pom ntawd nws tej kev kawm tsis nyob hauv nws nruab siab li. Tas txhua yam yuav pab tus me nyuam los ntawm cov ua niam ua txiv los , mas cov me nyuam thiaj mus txog qhov lawv xav mus. Yog cov niam txiv tsis nrog ua cov me nyuam no ua phooj ywg mas lawv yuav coj txawv li niam txiv xav, cuag li lawv tsis yog yus xya lo. Lawv tsis muaj lub siab tawv rau sab kev thoob tsib, lawv tawv rau sab tsis mloog lus, Vim ib twm tsis yog phooj ywg yus cob qhia tsis tau. Yam zoo yus hais nws saib zoo li yus yuam nws ua tej yam nws tis nyiam thiab phim txaj muag, nws lub siab tsis nyob ntawd, nws txaj muag ua tej yam zoo, Nws yuav swb lwm tus me nyuam cov neeg ua neej nyob txheej qis lawv ntshaw ua zoo li cov neeg nyob txheej siab. Ces Hmoob lo lus no thiaj muaj nyob mus li: Tub nom yog tub mlom. Tub qhev ua tub ntse. Cov yog niam yog txiv sawv daws lam yoog li kuv piav no saib kom muaj ib hnub twg, Cov tub Hmoob yog cov tub ntse tas nrho sawv daws tib si. Thaum muaj tej no lawm mas yus tsis txhob cem. Yus ua nws phooj ywg, yus nrog nws saib yam tsis zoo yus maj mam tig yuav siv ntau lub xyoo los tig thiaj dhau. Koj tig tam sis ntawd tsis tau. Neb yuav rov ua yeeb ncuab viam koj twb txiav txim rau nws tias nws yog tus phem lawm. Yaj Xib Hwb Zoov Ntxheb