Łužica w tworjenju Ludvíka Kuby a Ante Trstenjaka
Transkrypt
Łužica w tworjenju Ludvíka Kuby a Ante Trstenjaka
CHRISTINA BOGUSZOWA, Budyšin Łužica w tworjenju Ludvíka Kuby a Ante Trstenjaka Rěčeć wo tworjenju Ludvíka Kuby w zwisku z Łužicu njeje móžno bjez naspomnjenja a blišeho wobswětlenja dalšeho wuměłca, kotrehož tworjenje wotbłyšćuje wuměłske rozestajenje ze Serbami, molerja Ante Trstenjaka. Mjenje čěskeho ludowědnika, hudźbnika, spisowaćela a molerja Ludvíka Kuby a słowjenskeho molerja Ante Trstenjaka stejitej za dweju wusahowaceju słowjanskeju molerjow swojeho časa, zdobom pak tež za posrědnikow wuwića serbskeho powołanskeho wuměłstwa spočatk dwacetych lět zašłeho lětstotka. Najebać starobneho rozdźěla cyłeje generacije wo wjace hač třiceći lět mjez staršim Ludvíkom Kubu a młodšim Ante Trstenjakom křižujetej so jeju žiwjenskej pućej a jeju wuměłske wuwiće pod zajimawymi aspektami, kotrež zdadźa so mi tudy naspomnjenja hódne. Wosomdźesate a předewšěm dźewjećdźesate lěta so chilaceho 19. lětstotka běchu po cyłej Europje čas narodneho sebjenamakanja, předewšěm słowjanskich ludow, kotrež žedźachu za samostatnym narodnym statom. Dale a spěšnišo postupowacy proces industrializacije wupłodźi rozmach ludowědnych slědźenjow a tematizowanje zapřijećow domizna a škit domizny. Přewjedźenje wobšěrnych narodopisnych wustajeńcow wjercholeše zwjetša we wutworjenju narodnych muzejow. W Serbach wjazaše so tute hibanje z wosobu dr. Arnošta Muki, kotryž steješe jako protagonist na čole narodopisnych prócowanjow. W hódnoće narodneje kultury widźeše zakład narodneho wědomja. Tute zmyslenje je so z dorazom na wulkej wustajeńcy Sakskeho rjemjesła a wuměłskeho přemysła prěni raz z wobšěrnym serbskim podźělom 1896 w Drježdźanach manifestěrowało. Jako so 1898 na iniciatiwu Arnošta Muki sekcija ludowěda při Maćicy Serbskej załoži, běše so do jeje dźěłoweho programa nimo zběranja a sfiksowanja swědkow ludoweje kultury tež wožiwjenje hižo so pozhubjowacych tradicijow wosebje pak narodneje drasty a ludowych nałožkow zapisało. (1) 1903 wutwori so při Maćicy Serbskej sekcija za zachowanje serbskich narodnych drastow w mólbach. (2) Trěbnosć dźěławosće tajkeje sekcije widźachu Maćicarjo w postupnym pozhubjenju serbskeje narodneje drasty. Jich zaměr běše, mnohostronskosć a jónkrótnosć serbskeje narodneje drasty w mólbach zapopadnyć. Hladajo na to, zo tehdy hišće barbneje fotografije njebě, zwosta to jenička móžnosć etnografiskeje dokumentacije, barbnu pychu narodnych drastow zwěčnić. Ale kajka běše situacija w serbskim tworjacym wuměłstwje? Štó móhł tutomu naročnemu nadawkej wotpowědować? Spočatki serbskeho tworjaceho wuměłstwa počachu so hakle dwaceći lět pozdźišo skromnje wuwiwać. (3) Tehdy jenički młody wuměłc serbskeho pochada, Budyšan Jurij Hajna, steješe hišće na spočatku swojeho wukubłanja, kotrež zakónči hakle 1914 z mišterskim studijom na Drježdźanskej wuměłstwowej akademiji, prjedy hač so 1919 w swojim ródnym měsće zasydli. W lěće 1902 zjewi so mjeno němskeho molerja Wiliama Krause z Drježdźan. Williama Krause, absolwenta Drježdźanskeje wuměłstwoweje akademije a šulerja Carla Bantzera a Heinricha Prella, wabješe wosebje Slepjanska kónčina. Tam molowaše žiwjenje serbskeje ludnosće, kaž so wone jemu tehdy skićeše. Tu namaka w dalokej měrje to, štož pytaše: bohatosć narodneje drasty, žiwe nałožki a molersku krajinu. Wuměłstwo Williama Krause wotbłyšćowaše duchowne nastajenje domizniskeho molerstwa, kotrež wuchadźeše z idealizowaceho, wokrasnjowaceho a realiće zdaleneho wida. W předstajenju žiwjenja wjesnjanjow njedźelu a po swjatoku widźachu molerjo najlěpšu móžnosć, cyły spektrum namrětych tradicijow burstwa předstajić. Socialneje problematiki a towaršnostnych brachow so wědomje njedótkachu. Tutón wid, wodźeny wot wotmysła, zapopadnyć „wobrazy tamnišeho ludoweho žiwjenja“, kryješe so ze zmyslenjom a postupowanjom tehdyšich ludowědnych prócowanjow wokoło Arnošta Muki. (4) Jako so „Slepjanske wobrazy“ Williama Krausy 1905 na Delnjošleskej přemysłowej a industrijowej wustajeńcy pokazachu, swědčachu w němskej zjawnosći wo bohatosći a swojoraznosći serbskeho etnikuma. 1904 dari farar Handrik w mjenje wuměłskeho wotrjada Maćicy Serbskeje do zběrki Serbskeho muzeja dwě wolijowej mólbje Williama Krause a to „Slepjanska kmótra“ z lěta 1902 a „Holca ducy na polo“ z lěta 1904. „Slepjanske“ twórby Williama Krause stejachu na spočatku wuměłstwoweho směra, kotrež nastachu pod předznakom etnografiskeje dokumentacije hišće žiweje serbskeje ludoweje kultury. Jemu slědowachu w přichodnymaj lětdźesatkomaj dalši molerjo wšelakich narodnosćow a ze wšelakimi wuměłskimi, estetiskimi a filozofiskimi narokami. Mjez nimi wšitkimi pak wusahujetaj dwaj wuměłcaj - Ludvík Kuba a Ante Trstenjak. Jako so 1906 wuměłski wotrjad při Maćicy Serbskej wutwori, buštaj dwaj molerjej z prěnimaj sobustawomaj: Němc William Krause a Čech Ludvík Kuba. Mjeno Ludvíka Kuby njebě tehdy w kruhach serbskeje inteligency dawno hižo njeznate. Dwě lěće po wudaću prěnjeho zešiwka „Słowjanstwo w swojich spěwach“ pućowaše Kuba 1886 prěni raz do Łužicy, zo by sej tam ludowe spěwy Serbow zapisował. W tutych lětach nawjaza młody Kuba styki k Michałej Hórnikej a Arnoštej Muce. Poćah k Muce rozrosće w běhu lět ke krutemu přećelstwu. Kaž pisa Kuba w swojich žiwjenskich dopomnjenkach „Zaschlá paleta“ běše to předewšěm Muka, kotryž pohonjowaše Kubu wobstajnje,: „ ... molować wobrazy ze žiwjenja łužiskich Serbow, podawizny z kwasnych swjedźenjow, z delnjołužiskich Błótow, a docyła ze žiwjenja ludu, kotrehož narodna drasta ma swětowe mjeno. Sym wšak dyrbjał Muce zawěsćić, zo mi k tomu nimo wuměłstwa ničo njepobrachuje a namołwjach jeho tohodla wo trochu sćerpnosće, doniž so něčeho njenawuču. Kelko toho je trjeba hišće dohonić, wo tym sym so přeswědčił w Mostarju“. (5) W Mostarju běše so Kuba 1895 zasydlił, po tym zo běše swoje wuměłske wukubłanje w Parisu zakónčił. Wotchad do Parisa w lěće 1893 měješe Kubje być jasny wobrot w jeho dotalnym žiwjenju: fyzisce, psychisce a ekonomisce wučerpany a přesłapjeny wo njezajimje za jeho monumentalne zběraćelske dźěło za „Słowjanstwo w swojich spěwach“, chcyše Kuba wotnětka swojemu powołanju jako wuměłc a moler slědować. (6) Njespokojnosć z dotalnym wukubłanjom w Praze pola Maxa Pirnera a zapróšena atmosfera na Praskej wuměłstwowej akademiji, kiž wuznamjenjenja so přez konserwatiwny akademizm, klasicistiske a romantiske tendency a preferowanje wobrysowych rysowankow po nježiwych figurach, pohnuchu Kubu k tutomu krokej. Wjetšina přisłušnikow Kuboweje generacije je wotešła studować do Mnichowa, Wiena abo Parisa. W francoskej stolicy, w srjedźišću moderneho europskeho wuměłstwa, pak skićeše so Kubje wuměłsce cyle hinaša situacija hač w Praze. Dyrješe zwěsćić, zo je so z impresionizmom nowa epocha w molerstwje zahajiła. W Čechach jewjachu so stilistiske znamjenja impresionizma najzašo w tworjenju krajinarja Antonina Slavíčeka wokoło 1895/1896, kotryž so prócowaše jemu spožčić čěski charakter. Do Parisa přińdźe Kuba z krutym zaměrom, so stać z naslědnikom swojeho krajana Jaroslava Čermáka. Kuba identifikowaše so z jeho narodno-romantiskim heroizmom, z kotrymž molowaše předewšěm historiske temy. Z hłownym zaměrom studijow w Parisu pak bě jemu nawuknjenje molowanja z wolijowymi barbami. Dotal wužiwanej technice rysowanki a akwarela, kotrejž stej jemu předewšěm na pućowanjach po słowjanskim swěće k pomocy byłoj, jemu hižo wuměłsce njedosahaštej. K rozsudnym momentam na spočatku Kuboweho přebywanja w Parisu liči fakt, zo zezna tudy hišće čěskeho wuměłca Vojtěcha Hynaisa, prjedy hač bu tutón kónc lěta 1893 za profesuru na Prasku wuměłstwowu akademiju wotwołany. Hynais, přisłušnik „generacije narodneho dźiwadła“ ličeše k zastupjerjam pózdnjoromantiskeho historiskeho molerstwa w Čechach, kotremuž čuješe so Kuba ideelnje bliski. Wot njeho naćisnjene a wuwjedźene zawěški za Narodne dźiwadło w Praze počesćichu so w Francoskej z wysokim wuměłskim wuznamjenjom. W Parisu bě so Hynais stał z „wótcom“ přichadźacych čěskich wuměłcow. Tež Ludvíkej Kubje doporuči wón wotpowědne šule, priwatnu akademiju Rodolpha Juliena a akademiju Fillipa Colarossia. (7) Hižo po nawróće Ludvíka Kuby z Balkana 1893 a w rezignaciji dla njedokónčenja swojeho wobšěrneho etnomuzikologiskeho dźěła „Słowjanstwo w swojich spěwach“ je Kuba wobzamknył druhi reprezentatiwny cyklus „Słowjanstwo w swojich wobrazach“ zahajić. Pariske wukubłanje pak jemu njeda wuměłsku wěstosć, z kotrejž chcyše so na tute předewzaće zwažić. Tehdy sebjekritisce dopózna, zo njeje w Parisu wolijowe molerstwo w tajkej měrje nawuknył, kaž bě to chcył. Tuž přida dalšich sydom lět wukubłanja w Mnichowje na priwatnej šuli Słowjenca Ante Ažby. Na šuli, hdźež studowachu nimo łužiskich Serbow přisłušnicy wšitkich słowjanskich narodow, profitowaše Kuba stilistisce najbóle wot sylneho zaćisča, kotrež wukonješe na njeho molerstwo ruskich komilitonow. Mjez nimi běchu šulerjo Ilje Jefimowiča Repina, absolwenća Pětrohródskeje wuměłstwoweje akademije. Jich robustny realizm impresionistiskeje wersije wotpowědowaše stilistiskim nahladam Kuby. Zmysłojte dožiwjenje bě jemu žórło dopóznaća, wuměłstwo staješe nad wědu. 1904 wozjewi w časopisu „Dílo“ w swojich přednoškach „Tři rozhovory o umění“: Naše dušine žiwjenje je w zasadźe dwójne. Wuslědk jednoho stej wěda a wědomosć, druhe wuměłstwo. Ja ze swojeho stejišća sem preferuju wuměłstwo před wědu.“ (8) Wot tuteje doby sem přewahuje w jeho tworjenju mólba. Tematiskemu wobłukej etnografiskeho molerstwa so něhdźe wot 1918 sem z dźěłami z Balkana zaměrnje wěnowaše. Do mjenowaneje doby sahaja spočatki znajomosće Ludvíka Kuby z Josefom Pátu. Zeznaštaj so prawdźepodobnje 1918 po wozjewjenju samostatnosće čěskosłowakskeho stata na „Slovánským ostrově“ w Praze. Po wuwołanju samostatnosće prócowaše so Páta wo wobnowjenje čěsko-serbskeho towarstwa „Adolf Černý“, kotrež měješe wotnětka być cyłostatne a mjezynarodne towarstwo. (9) To pohnu Ludvíka Kubu so stać z jeho čłonom a tuž přistupi zjednoćenstwu hišće w samsnym lěće. Hižo wot lěta 1903 sem je Kuba serbskich wótčincow za 1904 poswjećeny Maćičny dom w Budyšinje portretował. „Jako sobustawa towarstwa mje wo to prošachu, zo bych swoje tworjace skutkowanje wěnował tež Łužicy. Wobrazować narodne drasty, typy, napohlad twarjenjow, tak daloko kaž su do dźensnišeho časa zakhowane we woběmaj Łužicomaj, to je mój zaměr.“ (10) Zaměr, wokoło kotrehož kružachu mysle Muki a Kuby hižo kónc 90tych lět 19. lětstotka, naby nětkole cyle konkretne kontury. Za Ludvíka Kubu woznamjenješe tutón wužadacy nadawk zdobom nowu nadźiju a bě pohon do dalšeho wuměłskeho dźěła. Kuba, tehdy blisko 60. žiwjenskeho lěta, tčeše we hłubokej wosobinskej krizy. Bilanca swojeho dotalneho žiwjenskeho dźěła zdaše so jemu słaba. Jeho monumentalnej předewzaći, słowjanstwo přez swoje spěwy wopisać a we wobrazach zwěčnić, njeběštej zrealizowanej. Josef Páta a Vladimír Zmeškal, jeho běše Kuba 1920 zeznał, prócowaštaj so hižo wot 1921 sem wo financielne zaručenje Kuboweje molerskeje wuprawy do Łužicy. Po jednanjach Zmeškala z ministerstwom šulstwa a jeho sekcijskim šefom Františekom Mlčochom so jemu podpěra we wysokosći 10 000 Kčs přizwoli. Z pućowanjom do Łužicy kónc junija 1922 zahaji so wurazna žiwjenska dekada, kotrejež wupłód běše nastaće cyklow z Łužicy, Balkana, karpatskeje Ruskeje a Słowakskeje. Z tworićelskeho wida sem woznamjenješe tuta dekada cezuru mjez hłownymaj wotrězkomaj molerskeho tworjenja. Nastachu-li dotalne etnografisce zapołožene mólby a rysowanki mjenje a bóle epizodisce, stejachu tomu napřećo wobrazy z Łužicy z lět 1922/1923, wot wšeho spočatka planowane a jako jenički cil wobeju jězbow. W swojim łužiskim cyklu molowaše Kuba podobizny ludowych typow w narodnych drastach, kajkež su so tehdy we Łužicy hišće wšědnje nosyli. Kubje dźěše tehdy wo nastaće kompletneho drastoweho systema, płaćiweho za konkretnu městnosć a konkretny čas. Z tym je přez wuměłske zwuraznjenje nastał wědomostny dokument, kotryž nima ani w Kubowym tworjenju ani w europskich wuměłskich stawiznach analogije. Swój wid na dwójnu funkciju swojich etnografiskich twórbow jako dokument a wuměłstwo rozjasnjuje Kuba we wobšěrnym přednošku „Narodna drasta Serbow“, kotryž přednjese Ludvík Kuba na zhromadźiznje Maćicy Serbskeje dnja 3. winowca 1923 składnostnje druheje wustajeńcy swojich łužiskich wobrazow w Budyskim Serbskim domje: „Drasta ludu nima jenož nadawk kryć nahotu ćěła, wona ma stołmačić tež wuraz duše, zmyslenje ludu, jeho filizofiski nahlad na swět. .... Wotměrjeny čas, kiž njedowoleše mojim modelam dołho sedźeć, mje nućeše někotru stronku zakomdźić. Tuž sym radšo něšto ze zwonkownosće přepušćił, a sym so prócował podać nic jenož drastu, ale runje z pomocu drasty wosobnosć a dušu luda serbskeho.“ (11) W teoretiskich rozjimanjach artikulowaše so Kuba přećiwo kritikarjam, kotřiž widźachu přećiwk mjez ludowědu a wuměłstwom. Za njeho płaćeše: „Ludowěda w swojim hłubokim a poprawnym zmysle njeje někajki přećiwk k wuměłstwo. Nawopak, z njeje je wyše wuměłstwo wušło, z jeje pomocu so wuwije a ludowěda je hač do dźensa wobnowja a wokřewja.“ (12) Kubu fascinowaše na swojimaj łužiskimaj pućowanjomaj 1922/1923 mnohota wšelakorych wariantow narodneje drasty w jednym regionje, w čimž rozeznawaše po jeho měnjenju serbska narodna drasta wot wšitkich druhich słowjanskich narodnych drastow. Bě překwapjeny, kajku bohatosć wotsćinow a refleksow chowa w sebi barbna hamonija samo nimale monochromneje čorno-běłeje swjedźenskeje abo žarowanskeje drasty. Kuba moluje we Łužicy z ryzy njeměšanymi barbami prismy a zapřija skutkownosć njepomolowaneho płatna do wobraza. Stilistisce zapołoži Kuba swoje wobrazy impresionistisce, da so wodźić wot zmysłowych začućow a da barby a swětło hromadu skutkować. Impresionistiske zasady pak podrjaduje swojemu narokej wo harmoniji wonkowneho napohlada a nutřkowneje bytosće modela. Kuba je so na swojimaj pućowanjomaj po Łužicy přewažnje drasće wěnował, jenož někotre jednotliwe wobrazy z wjesnymi napohladami a žanrowymi scenami nastachu. Zo paruja jeho łužiske wobrazy aktiwny moment a konkretnu činitosć drje je w dokumentariskim charakteru předewzaća samoho zakótwjene. Na woběmaj molerskimaj wuprawomaj nasta pozdatnje 35 wobrazow. W Serbach a w Čechach nazhonichu mólby Kuby z Łužicy wulke připóznaće. Serbske Nowiny pisachu 4. winowca 1922, zo dźakowachu so Maćicarjo Ludvíkej Kubje „z hrimotacej sławu zdobom na swětosławne dźěło ...”. 1924 jednaše Vladimír Zmeškal z ministerstwom šulstwa wo nakupje cyklusa łužiskich dźěłow. Statna galerija nochcyše cyklus łužiskich wobrazow měć, a tuž přepodachu so ludowědnemu wotrjadej Narodneho muzeja w Praze. Stat nakupi 56 wobrazow łužiskeho cyklusa a zapłaći za nje jónkrótnje sumu we wysokosći 50.000 Kčs. W slědowacych pjeć lětach wotpłaćowaše molerjej lětnje po 20.000 Kčs. To woznamjenješe za Ludvíka Kubu skónčnje kónc financnych wuskosćow a zwoprawdźenje swojeho žiwjenskeho předewzaća, wudaća „Słowjanstwa w swojich spěwach“. Zmeškal a towarstwo „Adolf Černý“ mějachu wotpohlad, wudać wosebity wuměłski album z reprodukcijemi łužiskich dźěłow a tekstami wo Serbach w swětowych rěčach, k čemuž pak njedóńdźe. Wudało pak je towarstwo dwě seriji pohladnicow. Prěnja serija wobsahowaše dźesać motiwow z cyłeje Łužicy a druha wopřiješe tohorunja dźesać motiwow, reprodukowachu pak so předewšěm narodne drasty z Delnjeje Łužicy. Wobaj nakładaj wudaštej so we wysokosći 10.000 eksemplarow. Tutej so w běhu dweju lět kompletnje rozpředaštej. Hižo prěnja wustajeńca Kubowych serbskich mólbow na swjedźenskej žurli Praskeje sokołskeje organizacije běše za njeho wulki wuspěch. Organizowało běše ekspoziciju towarstwo „Adolf Černý zhromadnje ze sokołskej organizaciju. Wustajeńcu wopyta prěni president Čěskosłowakskeje Tomaš G. Masaryk, kotryž jedyn wobraz kupi. (13) Prawdźepodobnje jedna so tu wo twórbu „Husler Jan Kušk wotprawa“, dźensa we wobsydstwje Serbskeho muzeja w Budyšinje. Dalšej mólbje kupištej narodna čěskosłowakska rada a ratarska rada. Wustajeńcu wopyta něhdźe 2000 ludźi. Mjez nimi bě młody słowjenski student Praskeje wuměłstwoweje akademije Ante Trstenjak, za kotrehož měješe wopyt signifikantny wuznam. Jako bě so Ante Trstenjak 1894 w Slamjaku blisko Ljutoměra narodźił, studowaše Ludvík Kuba, tehdy hižo 31lětny, w Parisu molerstwo. Trstenjakowy wuměłski talent so zahe na wuměłskich kubłanišćach we Wienje, Grazu a Zagrebje spěchowaše. Njespokojeny z wukubłanja w Zagrebje měješe wotpohlad hić na dalše studije do Mnichowa. Tola hladajo na wysoke žiwjenske kóšty w centrumje němskeho wuměłstwa rozsudźi so Trstenjak za Prahu. Tu zapisa so na Akademiji rjanych wuměłstwow a sta so ze šulerjom molerja Vojtěcha Hynaisa, woneho molerja, kotryž je Ludvíka Kubu w Parisu podpěrał. Situacija wuměłstwa, kajkuž ju Trstenjak za čas swojeho přichada 1920 w Praze namaka, běše dospołnje hinaša hač bě ju Kuba nimale třiceći lět prjedy dožiwił. W Praze jewjachu so wot spočatka 20. lětstotka sem moderne prudy europskeho wuměłstwa kaž impresionizm, symbolizm, secesija a druhe. Rozwiće čěskeho impresionizma je Ludvík Kuba po swojim nawróće z Wiena 1911 směrodajnje sobu postajował. Předewšěm pak hraješe zjednoćenstwo čěskich molerjow „Mánes“, załožene 1887 a kotremuž tež Ludvík Kuba přisłušeše, w tutym procesu progresiwnu rólu. Wone je přesadźenje modernizma w čěskim tworjacym wuměłstwje pospěšiło. Znajomstwo Trstenjaka z Kubu a jeho wuměłstwom bazuje na stykach młodeho słowjenskeho studenta k wuměłstwowemu towarstwu „Mánes“, kotrehož wustajeńcy sej Trstenjak w Praze prawidłownje wobhladowaše. Wuši wosobinski kontakt abo přećelski zwisk mjez Kubu a Trstenjakom pak po wšěm zdaću njewobsteješe, byrnjež Trstenjak 1926 čěsko-serbskemu towarstwu „Adolf Černý“ přistupił, hdźež běše Kuba hižo wosom lět z čłonom. Zetkanje Ante Trstenjaka z łužiskimi dźěłami Ludvíka Kuby 1922 běše za Słowjenca zdobom prěnje zetkanje z kulturu a folkloru łužiskich Serbow. Pod hłubokim zaćišćom Kubowych serbskich wobrazow wobzamkny Trstenjak runja Kubje, Łužicu wopytać a tworić dokumenty wo narodnych drastach Serbow Hornjeje a Delnjeje Łužicy. Po zakónčenju swojeho studija na wuměłstwowej akademiji w Praze poda so Trstenjak na dalši studij do Parisa. Tam přebywaše na posrědnistwo juhosłowjanskeho pósłanstwa z francoskim stipendijom wot 1924 do 1927. Pokročowaše ze swojim wukubłanjom, mjez druhim tež w priwatnej akademiji Collarossija, hdźež běše hižo Ludvík Kuba wot 1893 do 1895 studował. W Praskich studijnych lětach je Trstenjak so stał z wuběrnym portretistom, wotnětka pak wěnowaše so předewšěm zwobraznjenju krajiny. Běše-li hač dotal stilistisce impresionizmej bliski, při čimž jeho problem swětła najbóle zajimowaše, su wot 1926 prěnje ekspresiwne wotsćiny a wotwobroćenje wot realistiskeho wida w jeho molerstwje njepřewidźomne. Jasnu barbojtosć, kotruž nałožowaše předewšěm w akwarelach, wobchowa sej Trstenjak tež w swojich mólbach a orientuje so w Pariskich lětach po molerskich nahladach francoskeho wuměłca Maurica de Vlamincka. Ale tež molerstwo Andréa Deraina a Henria Matissa jeho sylnje wobwliwowaše. Wulki wosobinski wuspěch woznamjenjachu jemu wustajeńcy w nazymskim salonje “Salon de automne”, do kotrehož čłonstwa jeho přijachu. Nimo wuspěcha a dobrych kritikow na dalšich wustajeńcach w Ljubljanje, Mariborje a Praze, njepozhubi so we wuměłcu sylny zaćišć Kubowych serbskich wobrazow a z tym přeće pućowanja do Łužicy. Za čas studijneho přebytka w Parisu zezna so 1927 z Francozowku Marie de Vaux de Phalipau, tehdyšej městopředsydku Pariskeho Towarstwa přećelow łužiskich Serbow. Wona pohonjowaše Trstenjaka, zo by kolekciju etniskich typow łužiskich Serbow zestajał. Za to chcyše jemu stipendij francoskeje akademije zaručić, z čehož pak ničo njebu. Dźakowano doporučenju Vladimíra Zmeškala a dobrym kontaktam k serbskim studentam w towarstwje „Adolf Černý“, wosebje k studentej filozofije Jurjej Henčlej a studentej prawa Jurjej Cyžej, nastupi Trstenjak bjez kóždeježkuli financielneje podpěry swoju prěnju jězbu do Łužicy w septembru 1928. Runja Ludvíkej Kubje běše Trstenjakej ze zaměrom jězby, tworić dokumenty narodnych drastow najmjeńšeho słowjanskeho naroda. Ale chcyše so tež - a to rozeznawa jeho wot Kubowych intencijow, wěnować łužiskej krajinje. Hišće měješe w swojej duchownej předstawje před wočomaj w Praskim Rudolfinumje spočatk lěta 1928 wustajene krajinowe akwarele a guaše, kotrež nastachu na jeho pućowanjach po Francoskej a Čěskej. Krajina słušeše wot časa přebywanja w Francoskej, a tu měješe pućowanje přez Bretagniju a Savoju klučowu poziciju, k najwoblubowanišim temam Trstenjaka. Jeho nachilnosći k lyriskemu předstajenju krajiny wotpowědowachu delnjołužiske Błóta ze swojimi bohatymi barbnymi refleksami so špihelowacych štomow w groblach a rěčnišćach drje najbóle. Trstenjaka zajimowachu stajnje so měnjaca atmosfera krajiny a jeje wšelakobarbne wotsćiny. Akwarel „Móst přez Sprjewju“, nastaty 1928 w Budyšinje, pokazuje na rozjasnjenu, pastelobarbnu paletu wuměłca, kajkaž jewi so wona z časa Pariskeho přebywanja. Kaž Ludvík Kuba rešeršowaše Ante Trstenjak na swojich wuprawach do Łužicy tež molerske problemy barby a swětła, rozestajowaše so z anatomiskimi zakonitosćemi a wukmani so w portretowym molerstwje. Do najlěpšich dźěłow jeho portretoweho wuměłstwa słuša podobizna dr. Arnošta Muki z lěta 1929, ke kotremuž měješe dobre wosobinske styki. Hižo 26 lět prjedy bě Ludvík Kuba Arnošta Muku zwobraznił, a tež tutón portret Muki słuša po wuměłskej kwaliće k wusahowacym podobiznam w seriji portretow serbskich wótčincow Ludvíka Kuby. Dwójce portretowaše Trstenjak delnjoserbsku spisowaćelku Minu Witkojc. Wona běše jemu kaž mnozy druzy Serbja, a tu předewšěm dr. Jan Cyž a Měrćin Nowak-Njechorński, na jeho pućowanju k pomocy. Mjez Ante Trstenjakom a Janom Cyžom, wosebje pak mjez Trstenjakom a Nowakom-Njechorńskim wuwi so přećelstwo, kotrež traješe cyłe žiwjenje. Wuchadźišćo wobeju wuměłcow za jeju tworićelske rozestajenje ze serbskim etnikumom a jeho bohatej folkloru běše Kubowy cyklus łužiskich wobrazow. Jeju prěnja zhromadna wustajeńca wotmě so 1931 pod protektoratom Towarstwa přećelow łužiskich Serbow w Zagrebje. 1965 wuhotowa so w Budyskim měšćanskim muzeju znowa zhromadna pokazka Trstenjaka a Nowaka-Njechorńskeho. Zrozumjenje wšitkich třoch wuměłcow - Kuby, Trstenjaka a Nowaka-Njechorńskeho - wo etnografiskim molerstwje kryješe so w nahledźe, kotryž NowakNjechorński 1932 do slědowacych słowow zjima: „Nochcu być ‘drastowy moler’. Drasta je mi pódlanska wěc, pytam dušu serbskeho luda.“ (14) Trstenjakowej prěnjej serbskej modelej běštaj sotře Jurja Henčla z Kozarc, kotrejž w katolskej drasće zwobrazni. Hinak hač Ludvík Kuba, kotryž molowaše hnydom na městnje na płatno a wobraz po jednym abo po dwěmaj posedźenjomaj dokónči, Trstenjak swoje modele husto jenož skicěrowaše, tak zo nastachu přewažnje studije, kotrež moler po swojim nawróće w Praskim ateljeju wuměłsce wobdźěłaše. Běše-li so Kuba bjezwuwzaćnje tehdy hišće žiwym serbskim drastam wěnował, tak zwěčni Trstenjak tež drasty Wochožanskeje a Budyskeje ewangelskeje kónčiny, kotrež so hižo njenošachu. Cyłkownje nasta za čas jeho łužiskeho přebywanja 30 wobrazow a mnoho skicow a naćiskow. Ličba wobrazow rozrosće po nawróće w ateljeju na 48. Najmarkantniši z nich drje je po skicach 1929/1930 na skazanku předsydy Serbskeje ludoweje banki dr. Posedela wuwjedźeny triptychon „Hołdowanje serbskim wótčincam“. Wulkoformatna mólba znazornja alegorisce hołdowanje Delnjeje a Hornjeje Łužicy wusahowacym wosobinam z wědomosće, wuměłstwa a kultury serbskeho narodneho žiwjenja. Na lěwym křidle triptychona je zwobraznjeny delnjoserbski kwas w Borkowach w Błótach, a prawa strona mólby předstaja putnikowanje katolskich Serbow k hnadownemu městnu w Róžeńće. Mólba, kotraž měješe w zmysle Trstenjaka pozběhnyć narodne sebjewědomje Serbow, wotbłyšćuje zdobom splećenje zamóžnosćow wuběrneho portretista a krajinarja. Łužiskim wuprawam slědowace wustajeńcy Trstenjakowych serbskich wobrazow - tute zahaji pokazka w Budyskim Maćičnym domje wot 28.11.-16.12. 1928 - žnějachu wulki wothłós tež w Praze, w Hradecy Králové, Mariborje, Osijeku a Zagrebje. Serbscy studenća zrozumichu wažnosć Trstenjakowych mólbow, tak zo wozjewichu dźesać motiwow jako pohladnicy. Zwjazk serbskich spisowaćelow wuda 1930 reprodukciju triptychona. Dźakowano nakupi nimale cyłeje zběrki łužiskich dźěłow Ludvíka Kuby přez čěskosłowakski stat je so „serbska galerija“, kaž ju Kuba sam mjenowaše, w swojej kompletnosći zachowała. Trstenjakowe serbske dźěła njejsu so porno tomu w cyłku zachować móhli. Zdźěla je jich wosud hač do dźensnišeho njewujasnjeny. Wjetšina chowaše so za čas nacistiskeje okupacije w rumnosćach čěskoserbskeho towarstwa, kotrehož wobsydstwo wone běchu. (15) 1939 su je gestapowcy sćazali. Na tute wašnje zhubi so tež wjace hač 80 dźěłow Měrćina Nowaka-Njechorńskeho z wobsydstwa towarstwa. (16) Po wójnje bu wosebita komisija zasadźena, zo by konfiskowane wobrazy pytała. Jenož 11 Trstenjakowych łužiskich dźěłow je so do Narodneho muzeja w Praze dóstało. (17) W jeho domiznje wobsedźitej nimo priwatnikow Muzej nowšich stawiznow w Ljubljanje 12 a Wuměłska galerija w Mariborje - poslednja mjenowana pak předewšěm dźěła z 50tych a 60tych lět - 28 dźěłow ze serbskimi motiwami. Zakónčace słowa w nastawku Měrćina Nowaka-Njechorńskeho w Serbskich Nowinach z dnja 1. decembra 1928, kotrež komentuja wustajeńcu Ante Trstenjaka w Maćičnym domje w Budyšinje, njepłaća jeničce Trstenjakej, ale runje tak Ludvíkej Kubje. „Směmy so jara wjeselić, zo tutón wuměłc je namakał puć do našeje serbskeje Łužicy. Wón budźe hódny a khmany wěšćer serbskeje swojoraznosće, serbskeje krasy, haj serbskeje duše. Jeho sława přispori sławu našeje domizny, jeho dźěła budźeja swědčeć wo nas a našej zemi w dalokich krajach. Wone móžeja tam dobyć nowych zajimcow, přećelow našeje narodnosće a snadź takle přinjesć našemu ludej polěpšenje ćežkeho dóńta.“ (18) (1) Musiat, Sigmund: Sorbische / Wendische Vereine 1716-1937, Domowina-Verlag, Bautzen, 2001, S. 76 (2) tež tam (3) Lěta 1923 załoži so pod nawodom serbskeho překupca Maksa Štrympy prěnje Zjednoćenstwo serbskich tworjacych wuměłcow. Prěnja wustajeńca zjednoćenstwa wotmě so dnja 14.10. 1923 w Chrósćicach. Iniciator a duchowny motor zjenoćenstwa bě Měrćin Nowak-Njechorński. (4) Serbski rozhlad: In: Łužica. Budyšin 23, 1904, str.. 35 (5) Ludvík Kuba: Zaschlá paleta: Po druhé u Lužických Srbů, Praha 1958, str. 211 (6) Marie Clara Prchalová: Ludvík Kuba a Paříž, 1993, přednošk na wědomostnym kolokwiju składnostnje wustajeńcy „Ludvík Kuba a Łužica“, 1993 w serbskim muzeju w Budyšinje (7) tež tam (8) Ludvík Kuba: Tři rozhovory o umění, Časopis Dílo, 1904 (9) Vladimír Kristen: Ludvík Kuba a łužiscy Serbja mjez swětowymaj wójnomaj. W: Ludvík Kuba a Slovanská Etnografie, II. dil, Poděbrady, 1987 (10) Ludvík Kuba: Moje łužiske wopyty: łopjeno z awtobiografije. We: Łužica, Budyšin 37, 1922, str. 90-91 (11) Ludvík Kuba: Narodna drasta serbskeho luda. W: Serbske nowiny 7.12.1928 (12) Josef Vařeka. Národopisné obrazy Ludvíka Kuby z Lužice a jejich kulturní politickě význam. W : Ludvík Kuba a Slovanska Etnografie, II.díl, 1987 (13) Vladimír Zmeškal: Wo čěskim molerju Ludvíku Kubje. W: Předźenak 5.6.1965 (14) Maria Mirtschin: Sorbische Kunst. Die zwanziger und dreißiger Jahre. str. 42-43 Bautzen, Domowina-Verlag, 1992 (15) Serbski kulturny archiw, N IV, 11 E Listowanje z wosobinami z Juhosłowjanskeje, list dr. Janej Cyžej 27.10.1963 (16) (16) Serbski kulturny archiw, N IV, 18 D, Nachlass Dr. Jan Cyž (17) Maja Vetrih: Ante Trstenjak. Akademski slikar - Življenje in dilo, str.107-131 Pomurska založba, 1998 (18) Měrćin Nowak-Njechorński: Wustajeńca Ante Trstenjaka. Serbske Nowiny 1. decembra 1928 ZUSAMMENFASSUNG Die Lausitz im Schaffen Ludvík Kubas und Ante Trstenjaks Die Namen der beiden Künstler Ludvík Kuba (1863-1956) und Ante Trstenjak (1894-1970) stehen nicht nur für zwei herausragende slawische Maler ihrer Zeit, sondern sie zählen gleichzeitig zu den Wegbereitern der Entfaltung einer eigenständigen sorbischen professionellen bildenden Kunst. Mit ihrem ethnografischen Werk aus der sorbischen Lausitz haben sie wesentlich zum Nationalbewusstsein der Sorben und zum Ansehen des kleinsten slawischen Volkes im Ausland beigetragen. Im Lebensweg sowie im künstlerischen Werk beider Künstler zeigen sich bemerkenswerte Parallelen. Schon seit den 1890er Jahren ermunterte Arnošt Muka, Protagonist der sorbischen volkskundlichen Bestrebungen und Freund Ludvík Kubas, ihn beständig zur Darstellung aller zu jenem Zeitpunkt noch erhaltenen sorbischen Volkstrachten. Im Jahre 1903 wurde an der wissenschaftlichen Gesellschaft Maćica Serbska die Sektion zur Bewahrung sorbischer Volkstrachten auf Gemälden gegründet, deren Ziel es war, die Vielfalt und die Farbenpracht der sorbischen Volkstrachten in Form von Trachtengemälden für die Nachwelt festzuhalten. Innerhalb der Strömung der Heimatkunst und Brauchtumsmalerei interessierten sich zunehmend seit dem Beginn des 20. Jahrhunderts deutsche und slawische Maler für das sorbische Ethnikum. So gehörten der Deutsche William Krause und der Tscheche Ludvík Kuba im Gründungsjahr der künstlerischen Abteilung der Maćica Serbska 1906 als die einzigen beiden Maler der Sektion an. Mit seiner Wanderung in die Lausitz in den Jahren 1922/1923 begann im Gesamtschaffen Ludvík Kubas ein bedeutender Abschnitt, dessen Resultat die Entstehung der Zyklen aus der Lausitz, dem Balkan, Karpatenrusslands und der Slowakei ist. Kubas Zyklus seiner Lausitzer Arbeiten hat weder in seinem Werk noch in der europäischen Kunstgeschichte eine Analogie. Während der beiden Aufenthalte von Ludvik Kuba in der Lausitz 1922 und 1923 entstanden jeweils 35 Arbeiten, wovon 56 im Jahre 1924 vom tschechischen Staat angekauft worden sind. 1922 wurden in Prag erstmals Kubas sorbische Arbeiten gezeigt, die in dem damals jungen slowenischen Studenten der Akademie der schönen Künste in Prag, Ante Trstenjak einen tiefen Eindruck hinterließen. Angeregt und beeinflusst durch Ludvík Kubas ethnografische Werke aus der sorbischen Lausitz bereiste Trstenjak 1928 die Ober- und Niederlausitz. Ante Trstenjak stellte im Gegensatz zu Ludvík Kuba auch schon zu jenem Zeitpunkt schon abgelegte Trachten dar. Viele seiner Werke entstanden nach seinen Skizzen und Entwürfen aus der Lausitz in den darauffolgenden beiden Jahren 1929/1930 in seinem Prager Atelier. Ist Ludvík Kubas „Sorbische Galerie“ nahezu in ihrer Gesamtheit erhalten geblieben, so findet man die Lausitzer Arbeiten Ante Trstenjaks verstreut oder sie sind verschollen.