Směrnicy Załožby za serbski lud k spěchowanju projektow

Směrnicy
Załožby za serbski lud
k spěchowanju projektow
we wobłuku serbskeho tworjaceho wuměłstwa, serbskeho předstajaceho
wuměłstwa, serbskeje literatury, serbskeje hudźby, hladanja domizny a
pěstowanja nałožkow, dźěła z dźěćinu a młodźinu, wočerstwjenja dźěćiny a
młodźiny, zwonkainstitucionalneho wědomostneho dźěła, rěčnych kursow za
hornjo- a delnjoserbšćinu, njestatnych serbskich muzejow a domizniskich
stwow, předewzaćow w sociokulturnym wobłuku kaž tež stipendijow a
serbskich kulturnych pomnikow
I.
Powšitkowne postajenja
Wotrězk I wobsahuje powšitkowne postajenja, kotrež so zasadnje za wšitke wobłuki
spěchowanja nałožuja. Wudospołnjace a so wotchilace rjadowanja k jednotliwym
spěchowanskim wobłukam wobsahuja wotrězki II do XIV.
1.
1.1
Zaměr spěchowanja, prawniski zakład
Załožba za serbski lud přizwola podpěry ze zaměrom, serbsku rěč a kulturu
jako wuraz identity serbskeho ludu wobchować a wuwiwać.
1.2
Za přizwolenje podpěry płaća předpisy §§ 23, 44 Hospodarskeho porjada
Swobodneho stata Sakska (Sakski hospodarski porjad – SäHO) we
wozjewjenej wersiji z dnja 10. apryla 2001 (SächsGVBl. str. 153) a Nachwilne
zarjadniske předpisy Sakskeho statneho ministerstwa financow k § 44
Nachwilneho Sakskeho hospodarskeho porjada (Vorl. VwV-SäHO) z dnja 20.
oktobra 1997 (SächsABl. SDr. str. S649, S706), we wersiji z dnja 29.
septembra 1999 (SächsABl. SDr. str. S310, 316) w zwisku z předležacej
spěchowanskej směrnicu kaž tež ze zakonjom k Statnemu zrěčenju mjez
Krajom Braniborska a Swobodnym statom Sakska wo wutworjenju „Załožby za
serbski lud“ z dnja 9. decembra 1998 (SäGVBl. str. 629) a z dnja 26.
nowembra 1998 (BrbGVBl. I str. 220).
1.3
Prawo na spěchowanje jednotliwych naprawow njewobsteji. Podpěra přizwola
so na zakładźe přisłušneho wotwažowanja we wobłuku k dispoziciji stejacych
hospodarskich srědkow.
1.4
Jónu přizwolene podpěry njewjedu ani po přičinje ani po wysokosći k prawu na
spěchowanje w slědowacych lětach.
2.
2.1
Předmjet spěchowanja
Předmjet spěchowanja su we wotrězkach II do XIV mjenowane předewzaća.
Nimo toho móže so wobchodniska dźěławosć zarjadnišćow a zwjazkow
spěchować, kotrež su za rěč, wuměłstwo a kulturu Serbow wosebje
wuznamne.
2.2
Z tutoho spěchowanja wuzamknjene su:
a, předewzaća z přewažnje komercielnym charakterom,
b, beneficne zarjadowanja kaž tež
c, předewzaća k spěchowanju hospodarstwa.
3.
3.1
Pjenjezypřijimarjo
Pjenjezypřijimarjo móža přirodne a juristiske wosoby być.
3.2
Pjenjezypřijimarjo nimaja prawo, podpěry bjez přihłosowanja Załožby za
serbski lud třećim dale dawać.
4.
4.1
Wuměnjenja za podpěru
Spěchowanje je jenož móžne, wobsteji-li ze stron załožby dalokosahacy zajim
na naprawje.
4.2
Spěchuja so jenož předewzaća, z kotrychž přewjedźenjom so w času stajenja
próstwy hišće započało njeje. Załožba móže we woprawnjenych padach
wuwzaća dopušćić.
4.3
Pjenjezypřijimarjo a třeći maja so wotpowědnje swojej wukonliwosći a
swojemu zajimej na naprawje a jeje financowanju wobdźělić.
4.3.1 Předewzaće, za kotrež je so próstwa wo spěchowanje stajiła, ma so wot
zapodarja próstwy regularnje we wysokosći znajmjeńša pjeć procentow
cyłkownych wudawkow ze swójskich srědkow financować. We woprawnjenych
padach hodźa so wukony, kotrež so w hotowych pjenjezach njezarunaja, jako
swójski podźěl připóznać.
4.3.2 Zapodar próstwy ma so wo srědki priwatnych a zjawnych pjenjezydawarjow
prócować. Dobrowólne, bjezpłatne wukony třećich móža so wobkedźbować.
4.3.3 Dobrowólne, bjezpłatne wukony zapodarja próstwy a třećich njejsu wobstatk
financneho abo hospodarskeho plana a maja so separatnje wupokazać.
Dalokož su wone za přizwolenje wuznamne a spěchujomne wudawki
dopokazujomnje redukuja, móža so spěchowanske sadźby zwyšić.
4.4
Podpěry móža so jenož zapodarjam próstwy přidźělić, kotrychž sydło je w
němsko-serbskim sydlenskim rumje (Swobodny stat Sakska) resp. w
namrětym sydlenskim rumje Serbow (Kraj Braniborska) abo kotřiž předpołoža
projekt, kotrehož městno realizowanja w němsko-serbskim sydlenskim rumje
(Swobodny stat Sakska) resp. w namrětym sydlenskim rumje Serbow (Kraj
Braniborska) leži. Wo wuwzaćach rozsudźa Załožbowa rada.
5.
5.1
Forma a wobjim, wysokosć podpěry
Za předewzaća po čisle 2.1 sada 1 přizwola so podpěra jako projektne
spěchowanje. Zarjadnišća, mjenowane w čisle 2.1 sada 2, móža so
institucionalnje spěchować. Podpěra přizwola so w formje dźělneho
financowanja. Hdyž so hodźi, ma so při tym podpěra jako kruta suma dać.
Njeje-li to móžne, podawa so podpěra jako podźělne financowanje abo jako
financowanje njedostatka. Podpěra přizwola so jako wróćo njepłaćomna
přiražka.
5.2
Zakład za wobličenje wysokosće spěchowanja su cyłkowne spěchujomne
wudawki. K tomu liča we wobłuku projektneho spěchowanja wšitke w
njeposrědnym zwisku z předewzaćom trěbne wudawki. We woprawnjenych
padach móža to tež wudawki za sobudźěłaćerjow być, kotřiž su so
składnostnje předewzaća přistajili. We wobłuku institucionalneho spěchowanja
liča k tomu zasadnje wšě w hospodarskim planje zarjadnišća wobličene trěbne
wudawki.
5.2.1 Wudawki za zawěsćenja móža so jako spěchujomne připóznać, su-li zakonsce
předpisane abo k docpěću spěchowanskeho zaměra nuznje trěbne a su-li so
wot prawodohladowaceho zarjada załožby schwalili.
5.2.2 Wudawki za nakup abo zhotowjenje předmjetow móža so jako spěchujomne
připóznać, je-li to za přewjedźenje naprawy najrentabelniše rozrisanje. W
próstwje ma so rozjasnić, kak maja so předmjety po wotzamknjenju naprawy
dale wužiwać.
5.2.3 Zarjadniske wudawki móža so we wysokosći maksimalnje 15 procentow
zbytnych spěchujomnych wudawkow připóznać.
6.
6.1
Dalše postajenja k podpěrje
Njewoteda-li so wotličenje w postajenym času resp. w žadanej formje, so
samsnemu přijimarjej dalši raz srědki zasadnje njepřizwola. Wróćožadanja
załožby wostanu wot toho njewobliwowane.
7.
7.1
Postupowanje
Próstwy wo spěchowanje maja so zasadnje z wužiwanjom wotpowědneho
mustroweho formulara a ze wšěmi trěbnymi podłožkami (hlej 7.2) hač k 31.
januarej za projekty 1. połlěta kaž tež za cyłolětne projekty a hač k 31. julijej za
projekty 2. połlěta běžneho hospodarskeho lěta pola
Załožby za serbski lud
Póstowe naměsto 2
02625 Budyšin
tel.: 03591 / 550 307
faks: 03591 / 4 28 11
e-mejlka: [email protected]
zapodać.
Ze zapozdźenjom zapodate próstwy so wotpowědnje k dispoziciji stejacym
hospodarskim srědkam druhorjadnje wobjednawaja.
We woprawnjenych padach móže so próstwa tež krótkodobnje, tola
znajmjeńša 8 tydźenjow do spočatka projekta, stajić.
Próstwowe formulary a wotpowědne informacije dóstanjeće pod horjeka
mjenowanej adresu abo w slědowacych regionalnych běrowach załožby:
Załožba za serbski lud
Regionalny běrow Kamjenc
Při pastyrni 4
01920 Chrósćicy
tel.: 035796 / 96 891
faks: 035796 / 98 960
e-mejlka: [email protected]
Załožba za serbski lud
Regionalny běrow Slepo
Dróha měra 65
02959 Slepo
tel.: 035773 / 70085
faks: 035773 / 700 86
e-mejlka: [email protected]
Załožba za serbski lud
Regionalny běrow Wojerecy
Drježdźanska dróha 18
02977 Wojerecy
tel.: 03571 / 41 80 26
faks: 03571 / 41 80 27
e-mejlka: [email protected]
Załožba za serbski lud
Wotrjad Choćebuz
Augusta-Bebelowa-dróha 82
03046 Choćebuz
tel.: 0355 / 48576 461
faks: 0355 / 48576 462
e-mejlka: [email protected]
Próstwy njeměli zasadnje pod minimalnej spěchowanskej sumu we wysokosći
250,00 eurow ležeć.
7.2
Próstwje maja so připołožić:
- wopisanje projekta, z kotrehož su wotpohlad, postajenje zaměra a
wobsahowa koncepcija předewzaća spóznać,
- podaća wo časowym wobłuku realizacije projekta,
- detailěrowany, wurunany financny plan (rozklučowanje wšěch ze zaměrom
spěchowanja zwisowacych wudawkow a dochodow a jich wěcownje a
ličensce korektne rozłoženje),
- při prěnich próstwach a kóždej notarielnje wobkrućenej změnje towarstwow
abo druhich priwatnych nošerjow podłožki, kotrež podawaja informacije wo
zaměrje a prawokmanosći kaž na př. wustawki towarstwa, dopokaz zapisa
do towarstwoweho registra při hamtskim sudnistwje, připóznaće
powšitkownowužitnosće přez financny zarjad, zrěčenje towaršnikow (pola
tzwr).
7.3
Zaměrej wotpowědowace wužiwanje přizwolenych srědkow ma so tak woličić,
kaž to w přizwolenju podate wuměnjenja a wotpowědnje płaćace dodatne
postajenja předwidźa.
7.4
Za přizwolenje, wupłaćenje a wotličenje podpěry kaž tež za dopokaz a
pruwowanje wužiwanja a ewtl. trěbne zběhnjenje přizwolenja a wróćožadanje
přizwoleneje podpěry płaća Nachwilne zarjadniske předpisy k § 44 Sakskeho
hospodarskeho porjada, njejsu-li so w předležacej směrnicy wotchilenja
dopušćili.