Naša maceršcina 8 - serbsce - WITAJ

Naša maćeršćina 8
W nowym wuhotowanju prezentuje so wučbnica
maćeršćiny za šulerjow 8. lětnika. Nadźěłali su ju
wučerce wyšeje šule Milenka Ertelowa a Kerstin
Klingnerowa, rěčespytnicy Serbskeho instituta dr. Anja
Pohončowa
a
dr.
Jana
Šołćina,
wědomostna
sobudźěłaćerka RCW Manuela Smolina kaž tež
lektorka Daniela Heelemanowa.
Wučbnica je rozrjadowana do šěsć tematiskich
wobłukow „Čitać, rěčeć, pisać“, „Přemyslować wo
rěči“,
„Prawje
pisać“,
„Wo
wuwiću
rěče
so
informować“, „Wosobu předstajić“ a „Kontrolować, so
orientować“, kotrež su za lěpšu orientaciju we
wšelakich barbach wuhotowane. Kóždy z tutych wobłukow ma zawodnu stronu, na kotrejž so
šuler wo wobsahu a zaměrach jednotliweho tematiskeho wobłuka resp. kapitla informuje.
Tohorunja k orientaciji słuža barbnje podkładźene kašćiki – čerwjene za pomjatnu wědu, žołte
za wědu, kotraž je so w předchadźacych lětnikach posrědkowała, a z módrej barbu
zaramikowane su přidatne pokiwy za dźěło abo k maćiznje. Piktogramy při nadawkach
pokazuja na partnerske a skupinske dźěło, na zasadźenje dźěłoweje techniki abo metody, na
diferencowanosć.
Nowostka su štyri słuchanske teksty na CD do ruki wučerja, hdźež
sposrědkuja so wučerjej tohorunja namjety k rozrisanju nadawkow a
dalše pokiwy k maćiznje.
Aktualne temy kaž akceptanca serbšćiny w zjawnosći, nowe medije a z
tym zwjazane socialne syće so we wučbnicy wobjednawaja a so we
wšelakich nadawkach a tekstach stajnje zaso jewja: Šuler ma sej teksty spřistupnić, so
argumentatiwnje ze wšelakimi zjawami a widami rozestajeć abo we wobłuku gramatiki prawe
nałožowanje numeralow zwučować. Wučbnej planaj za wyše šule a gymnazij kaž tež
přepytowanja dr. Tima Meškanka nastupajo rěčne zamóžnosće šulerjow srjedźneho
schodźenka su zakład za wuběr kapitlow resp. wotrězkow we wučbnicy.